Голосник

Опроваджаня по выставі «Далі та Варголь», част 1 – середа, 20.00 год.

0

Од 23. марця до кінця вересня/септембра 2018 р. в Музею Театру ім. Генрика Томашевского во Вроцлаві мож видіти выставу Далі та Варголь. Всестранний Ґеній. То зоставліня ориґінальных творів двох неповторных артистів ХХ столітя – Енді Варголя та Сальвадора Далі.

Нич выберете ся на вроцлавску выставу, просиме на радийову прогульку по експозициі, котра вказувана была минулого рока во Варшаві. Є то тота сама колекция, лем презентувана під дакус зміненым наголовком – Далі контра Варголь. Штука, музыка, фільм.

Опроваджаня поділене є на дві части зо взгляду на обшырніст выставы та богатий коментар провідника, котрий в інтересуючий спосіб оповідат не лем о самых експонуваных роботах (з погранича мистецтва, штоденного жытя і жытя целебритів), але передає і вельо інформаций звязаных з жытьом обох артистів. Оповідат він як через мистецтво обох візийонерів креувало свій візерунок і світ довкола.

Дознате ся м.ін. про історию плякату зробленого Варгольом на замовліня Медженародного Олимпійского Комітету з нагоды Зимовых Олимпійскых Змагань. Речена серіґрафіка є єдином пробом в такых кольорах – зеленым і рожевым – яку зреалізувал ґрафік, выціняна в світі мистецтва на рівни з олійныма образами, хоц зроблена была о вельо туньшом і скоршом методом. Буде про тото, чом Варголь подумал схоснувати як раз банькы поливкы Campbell’s і як за тоту несподівану рекляму одвдячыл ся шеф фірмы. Почуєте історию стірчы Енді з Сальвадором і што єден другому зробил з образом, якы были іх спільны приметы, чым ся ріжнилo, а де сходилo пізріня на мистецтво обох ґеніів. В першій части реляциі дознате ся тіж дакус про маґазин «Інтервю» і про псевдо Варголя, о котрым невельох чуло. Што, а радше кого достал Енді од Сальвадора? Як перерывникы почуєте музыку з кружків ансамблів ци вокалистів, окладинкы котрых запроєктувал родак з Міковой. А о тыжден дознате ся о вельо більше про спілпрацу Варголя зо світом музыкы.

Завдякы авдициі будете мочы ліпше та веце видіти і зрозуміти, ідучы на вроцлавску едицию выставу. Красні просиме.


Премєра 1. части oпроваджаня по выставі «Далі та Варголь» в середу 4. квітня/апріля о 20.00 год., повторіня вночы з середы на четвер о 4.00 год. та в суботу 7. квітня/апріля о 15.00 год.

фот. пресовы материялы

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментар