Голосник

Опроваджаня по выставі «Далі та Варголь», част 2 – середа, 20.00 год.

0

Містецкій Музей во Вроцлаві од марця 2018 р. презентує выставу «Далі та Варголь. Всестранний Ґеній», котра продукувана є спільні з аґенцийом Digital Open Group. Звиджати ю мож до 30. вересня/септембра 2018 р.

Просиме на другу част радийового опроваджаня по презентуваній колекциі. Далі і Варголь передумані творили образ того, як постерігат іх світ, і до перфекциі присвоіли кумшт автопромоциі, осігаючы тото, чого оба пожадали найбарже – артистичну славу і богатство. Провокували, інспірували, родили скандалі і фурт затерали границі медже жытьом а мистецтвом. Были ексцентричны, контроверсийны, выкликували скрайны емоциі – од цікавости через аверсию по захопліня. Привидні ділило іх барз вельо: походжыня, язык, ментальніст, варштат. А лучыло хоц бы тото, же оба в тым самым часі діяли в Ню Йорку.

Думкодавчыньом выставы є Анета Фудалі. Завдякы спілпраци з ріжныма інституциями та приватныма колекцийонерами повело ся згромадити вартістну част доробку обох артистів. Творчіст Сальвадора Далі репрезентуют м.ін. штырі ориґінальны різбы, сериі ґрафік з красным проєктом Тарота (клевета бесідує, што Далі зачынал свій ден од вытягніня єдной карты тарота), фраґменты фільмів подля його сценариів аж і парфумы.

Серед Варгольовых робіт вынятковым обєктом выставы є колекция презентуюча результат спілпрацы короля поп-арту з музычныма компаніями. З реляциі м.ін. дознате ся, як Варголь обышол квестию неможности чорноскорых музыків фірмувати платні своім выглядом і як зміняли ся протягом років його проєкты. Буде повіджене дакус про окладинкы, котры барз скоро заняли місце в першій десятці найбарже неповторных проєктів в істориі дізайну окладинок. Дознате ся і про тото, котры артисты інспірували ся проєктами Варголя і чом окладинка посмертні печатаной платні Джона Ленона має одмінну од решты тонацию кольорів.

Творы на выставі не сут вказуваны хронолоґічні, ачий важнійше єст для орґанізаотрів вказати всестранніст обох артистів.

Завдякы авдициі будете мочы ліпше та веце видіти і зрозуміти, ідучы на вроцлавску едицию выставу. Красні просиме.


Премєра 2. части oпроваджаня по выставі «Далі та Варголь» пройде в середу 11. квітня/апріля о 20.00 год., повторіня вночы з середы на четвер о 4.00 год. та в суботу 14. квітня/апріля о 15.00 год.

фот. пресовы материялы

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментар