Голосник

Піддуклянці одпремєрують Безсмертного танечника

На пятніцю 17-го мая 2019-го року русиньске професіоналне тілесо Піддукляньскый умелецькый людовый субор (ПУЛС) одпремєрує музично-танечну інсценацію під назвов Безсмертный танечник.

Піддуклянці приготовили інсценацію, котра має быти святкованьом жывота і єдночасно одданьом почливости жыючій леґенді хореоґрафії Юрайови Кубанекови, котрый святкує 90 років жывота. Безсмертный танечник є повный вынятково добрых танечных выконів, невіроятной енерґії і прекрасной музикы повной емоцій. Режію інсценації робив ученик Юрая Кубанека – Ярослав Моравчік, музику скомпоновав Юліус Селчан.

Думку мав Кубанек

Як о новій інсценації повів директор ПУЛС-у Юрай Швантнер, отцьом думкы зробити премєру під назвов Безсмертный таненчик быв Кубанек, хоць хореоґрафію і режію взяв до своїх рук Моравчік.

„Думам, же той задачі згостив ся барз добрі, знаючі фолклорный матеріал із цалком довгого діяня в Словацькім людовім умелецькім колектіві (Slovenský ľudový umelecký kolektív). Знова раз хоснує свій смысел про рітм, веце ці менше штілізованый прояв, хоснує нетрадічны реквізіты, котры з гумором йому властным запрацовав до своїх хореоґрафій,“ повів Швантнер.

Як далше директор продовжовав, у співпраці з автором музикы, композітором і так само діріґентом в тій інсценації – Юліусом Селчаном, зробили музично-танечный театер, котрый при повнім решпектованю основы умелецького тілеса – людовый – умелецькый – професіоналный, перепаять сценічны музичны композіції з традічным фолклором.

ПУЛС є то найліпше, што маєме

За словами режісера Ярослава Моравчіка є авторьскый проєкт Юрая Кубанека Безсмертный танечник так дакус і його автобіоґрафійов, котров хоче оддати почливость вшыткым професіоналным танечникам, співакам і музикантам.

„З великым решпектом, покоров і одповідностьов єм прияв пропозіцію маестра на реалізацію хореоґрафії і режії той його думкы. Несмірно ціню собі тоту довіру. Я пересвідченый о тім, же ПУЛС є моментално то найліпше, што в тій области маєме. Тото тілесо має невіроятну енерґію, высокый інтерпретачный і умелецькый рівень, а єдночасно покору у вшыткых своїх умелецькых сеґментах,“ повів ку новій інсценації Моравчік. Безсмертным подля режісера інсценації може стати каждый, покля на світ смотрить очами сердця і красы.

Премєра новой інсценації Піддукляньского умелецького людового субору з назвов Безсмертный танечник одбуде ся 17-го мая о 18.30 год. на Великій сцені Театру Йонаша Заборьского в Пряшові. Друга премєра є напланована о день пізніше, в суботу 18-го мая в єднакім часі.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі