Голосник

Поле неоране

Яка різніця в тім, кедь Орбан має намагу підхопити собі Мадярів жыючіх за граніцями Мадярьска, і кедь Укаїнці мають намагу підхопити Українців поза граніцями свойой державы? Різніць є много. Тов основнов є, же Мадярі холем інтересують ся Мадярями.

В половині октобра депутат Верьховной рады Україны – член Европской солідарности Петра Порошенка, Олексій Гончаренко оголосив на своїм профілі на сіті Facebook, же вєдно із колеґами депутатами засновали меджіфракційне соєдиненя Кубань. Гончаренко став головов той платформы.

Як Гончаренко інформовав, задачов меджіфракційного соєдиненя має быти выпрацованя політікы навернутя до културного і соціалного поля україньскы етнічны теріторії і етнічных Українців. Наперед хотять дати порядок з реґіоном Кубань, в Російскій федерації, пак мають в мерьку і далшы реґіоны, де компактно жыють Українці.

Голова платформы україньского парламенту, котра іде штось навертати, пише, самособов, по російскы. Першый статус є о єдно слово богатшый. Гончаренко ся ішов пустити і до політічного поля. По дакілько годинах політічне поле із статусу счезло, но все є мож найти го в історії змін статусу. Якбач му хтось порадив, же грає барз высоков картов, котра бы могла выкликати різны реакції.

Но што є найліпше, у платформі окрім іншых находить ся і Софія Федина. Голосна труба україньской націоналістічной пропаґанды, чоловік, котрый у своїм репертоарі має бандерівскы співанкы, русинофобна особа, котра кликала на Русинів СБУ, кедь треба, та „Лемкыня“, котра українізує Лемків, кедь треба, та тота, котра буде перша кричати, же Орбан не має право підпорьовати Мадярів у Закарпатьскій области, бо то вмішованя до справ Україны. Тота Софія Федина днесь іде вертати до културного і соціалного поля україньскы етнічны теріторії і етнічных Українців. Она має быти єднов з тых людей, котры ку тому ідуть выпрацовати політіку.

Не знам, де бы мала быти різніця в тім, што має намагу робити Орбан, кедь підтримує Мадярів жыючіх в іншых державах, і кедь выникне парламентна платформа на Україні, котра має намагу робити тото саме з Українцями. На тото якбач Софія Федина одповідь, релевантну, не дасть, бо різніця в тім не є. Но є барз вельо різніць меджі тым, што робить Орбан, і кедь собі автор коментаря не думать, же Орбановы думкы суть чісты як лелія, а  тым, што має робити Кубань у Верьховній раді Україны.

По перше, сама назва платформы і то, де як перше штось ідуть навертати, є нич інше як провокація Росії. Провокація в тім часі, коли презідент Зеленьскый має намагу найти способ як закінчіти воєнськый конфлікт, жебы не вмерали далшы люди, жебы не терпіли, жебы могли, і кедь то буде довгый і складный процес, вернути ся до якогось нормалного жывота. І як потім ініціатівы Софії Федины мож назвати? Так іде сохраняти етнічных Українців, їх културу? Провокаційов?

По друге, уж теперь ся треба бояти, котры далшы реґіоны i як буде хотіти Кубань взяти до порядку. Головно зато, бо то не суть лем україньскы реґіоны, котры такы люди як Софія Федина хотять мати в мерьку і під контрольов.

Суть то i русиньскы теріторії, наприклад на Словакії або в Польщі, котры люди як Федина называють найзападнішыма україньскыма етнічныма теріторіями. Нич веце нам не треба, лем жебы іщі українізачна пропаґанда мала свій централный комітет, ці політбюро, прямо в україньскім парламенті і далше, з векшым тиском, баламутили Русинів.

І ту є тота велика різніця. Віктор Орбан інтересує ся Мадярями, но люди як Федина інтересують ся нелем Українцями, а і Русинами, котрых хотять далше українізовати. Кедь на Україні хтось кричіть, же ся Мадярьско вмішує до україньскых справ, што пак мож повісти о такій самій актівности, котру теперь хоче робити україньска парламентна платформа на теріторії іншых держав?

Навеце в припаді, кедь в їх мерьку не суть лем „етнічны Українці“, але і членове далшого народа, котрый бы они хотіли навсе вычеркнути з мапы світа.

Думам, же кедь хотять депутаты бісідовати о даякых полях, мали бы насамперед іти на поле неоране, і занимати ся ним. Є то поле людьскых і народностных прав, де мають роботы на пару добрых років. Поле културне і соціалне етнічных Українців жыючіх мімо Україну є на омного высшій уровни, як тото саме поле Українців на Україні.

Статя была написана як коментарь „Вступне до контроли“ лемківского радія lem.fm. Жрідло фотоґрафії Wikipedia.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі