Голосник

Потяг Мушына-Попрад тіж зимом

В зимовым періоді будут ходити надале потягы на пути Мушына-Попрад. То ефект великого заінтересуваня тым получыньом вчас тогорічных вакаций. Словацка влада приділила грошы на дальше курсуваня потягів.

Желізницьовы получыня через граничный перехід Мушына-Плавеч, якій не лем лучыт дві сусідні державы, але тіж Лемковину з Пряшівском Русю, были по долгых роках реактивуваны 29. червця/юнія тр. На основі договорів медже польском а словацком желізницями, потягы ходили в вікенды аж до кінця вакаций. Получыня тым більше вказало ся успіхом, понеже за остатніх десят років не было ниякых пасажерскых трансграничных получынь на тій пути. Договор довюл до того, што не лем были они привернены, але так само збудувано інтересуючу оферту, котра притягла увагу турустів і жытелів приграничных реґіонів.

З ініциятивом продолжыня получынь зимом вышли Желізниці Словацкой Республикы, якы звернули ся до Міністерства Транспорту Словацкой Республикы з внеском о дофінансуваня потягу тіж в інчых періодах. Внесок был успішно розсмотреный. Пак словацка страна поінформувала оператора по польскій страні, Малопольску Желізницю, што словацкє міністерство пристало на іх думку розшырити період курсуваня потягу реляциі Мушына-Попрад-Мушына в розкладі на рокы 2019/2020.

Закладат ся, што потяг буде ходил в суботы і неділі од 28. грудня/децембра 2019 р. до 1. марця 2020 р. Потягы мают быти ліпше скомунікуваны зо складами, котры дотерают до Мушыны і выізджают з ней в страну Нового Санча, Кракова і Крениці. А в Попраді трансграничный потяг має быти скорелюваный з получынями Татряньской Електричкы, котра довозит в самы Татры.

Словацка страна, подібні як літом тр., пустит на трасу дві пары потягів, котры буде обслугувал спалиновый тракцийный ансамбль сериі 840, якій выпродукуваный был Словаками. Білет в єдну сторону на цілій трасі надале буде коштувал 5 евро. Польска і словацка страны рахуют, што розшыріня періоду курсуваня потягу заохотит дальшых пасажерів, жебы хоснували як раз тот рід транспорту в прогульках в тым реґіоні Польщы і Словациі.

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі