Голосник

Порядок высыланя

З Фрыштиком легко ся обатурите. На початок дня принесеме кус інформаций, проповіме хвилю, а пак скоментуєме дашто чудне. До того вшытко прикрасиме найвеце традицийном музыком. (Богдан Ґамбаль)

Корзо – каждый робочій день сьме вашов інформачнов аґентуров. Выбераме про вас тото найактуалніше і найінтересніше, о чім пишуть світовы інформачны аґентуры і світовы медії. Вам старчіть слухати. (Петро Медвідь)

Новины – найсвіжшы вісти з цілого русиньского світа. (ред. ЛЕМ.фм)

Пачісна година – Де выбрати ся на прогульку в файне місце на Лемковині? Што здорове зварити на шпаргеті? Де што звучыт, што де грают, а де вказуют? Проґрам, якій є мішанином вшыткого, што ся актуальні діє. Просто всяка всячына. Просто про жытя. (Наталія Малецка-Новак)

Ґрамофон – тематічно выбераме музику, о котрій ся в нас дізнате і дашто веце. Глядаме повязаня, контексты і різны інтересности. (Петро Медвідь, Боґдан Ґамбаль)

Чырч Ґрамофон – Ваша найліпша парада – то в тым проґрамі почуєш лем парадну музыку, што Русины на цілым світі радо слухают. Не любиме повагы. Граме лем весело! А найважнійше, же то СВОЄ діско. (Севериян Косовскій)

Вступне до контроли – штотыждень коментарь Петра Медвідя на актуалну тему. Точка погляду на радію ЛЕМ.fm. (Петро Медвідь)

Слуховиско – література на вытягніня рукы. Проза, драма, поезия – лемківска, польска і світова. Презентувана є і лемківска клясика – том літературом выражат ся лемківска достоменніст. Выріжніня тых, а не інчых творів і писателів, якы постепенно сут друкуваны і переводжены на сучасний стандард лемківского языка, має як ціль – завдякы тым універсальным текстам – підтримувати лемківску етнічну свідоміст, достоменніст, выкоренити комплекс меньшецінности. Сучасний чытач найде в тых творах світ, котрого уж неє, але і тото, што остало лишене як спадковина – культуровий простір, в якым находят ся Лемкы як спадкоємці карпатской традициі. Сут они документами епохы, як і свідоцтвом языковых концепций предків. (Моніка Тылявска)

Языковий Гокус Покус – проґрам о языку в вельох його аспектах і просторах. Предовшыткым о русиньскым языку. Але, не лем, бо язык то язык, хоц, правда, тот материньскій – найціннійший! (Демко Трохановскій)

На добраніч – баі, байкы і оповіданкы для наймолодшых. Байкы з Лемковины і цілого світа, ріжных народів і культур. (Моніка Тылявска)

Там в горах Карпатах – проґрам, в котрым можете почути інтересуючы річы про минуле, про рідну Лемковину, але і жытя на чужыні. (Мирко Воргач)

Печатня – проґрам про бесіду, котра є надрукувана. Стрітиме ся з писменниками, зрецензуєме творы, выпромуєме напечатаны новости. Печатня – проґрам про русиньску літературу. (Богдан Ґамбаль)

Перегляд тыжня – послухай дописів порталю ЛЕМ.фм – Не маш часу чытати, а хочеш быти зо вшыткым набіжучо? Зробиме то за Тебе – выслухай дописів з даного тыжня поміщеных на поратли ЛЕМ.фм.

Тыжден дозаду (Боґдан Ґамбаль, Павел Малецкій)

Конечна Клюб (просит Аня Шмайда) – выбір музикы діско

З повагом (просит Павел Малецкій) – выбір клясичной музикы