Голосник

Русиния заповнила шпортову салу. Розділила 2000 евр

В пятніцю 28-го децембра 2018-го року в Гуменнім ансамбель Русиния зорґанізовав далшый із своїх бенефічных концертів.

За порядком четвертый бенефічный концерт ансамблю, котрый традічно проходить кінцьом рока, быв тот раз в просторах Містьской шпортовой салы в Гуменнім, і Русиния тоту салу заповнила. На благодарны діла своїм концертом вызберали 2000 евр.

Понад 120 выступаючіх

Русиния притягла на свій вже традічный концерт множество своїх любителів. В рамках проґраму вказало ся понад 120 выступаючіх, кедьже публіка могла видіти нелем ансамбель Русиния, а і колектів Люде спуд Бескіда, котрый співав русиньскы коляды, Фолклорный колектів Яношік із Михаловець, на сцені співала і сопраністка Марія Гаврилякова, на гуслях заграла Юлія Лихманова, а представив ся і школьскый орхестер Основной умелецькой школы на уліці Мєрова в Гуменнім. Цілій концерт вів Срджан Стоїльковіч, довгорічный діріґент ансамблю Русиния.

На концерті взяли участь і вызначны гості, меджі котрыма мож спомянути нового пріматора міста Гуменне Мілоша Мерічка, ці жупана Пряшівского самосправного краю Мілана Маєрьского.

Вызберали 2000 евр

Тот рік на благодарны цілі Русиния в рамках концерту вызберала цілково 2000 евр. Тоты горшы были розділены.

Як інформовала ґазету Podvihorlatské noviny Мілена Ланцошова, манажерка ансамблю, грошы ся дали про орґанізацію Червеного креста в Гуменнім, Янкови Барнови із села Уліч і Домову дітей (сиротинцю) родинного тіпу в Гуменнім.

„Щіро і од сердця дякуєме Оскарови Балоґачови, Антонії Лихмановій, Мірославови Піптови і Юрійови Ланцошови, котры дали грошы, а і Лісосельскогосподарьскому маєтку Уліч, котры дали і дрыва на куріня про вшыткых обдарованых,“ додала манажерка.

Русиния

Русиния – то мужскый співацькый хор, котрый замірявать ся на фолклорне співанкы, русиньскы але і іншых славяньскых народів. Ансамбель своїма актівностями хоче всокотити културны вартости і народны традіції Русинів і пропаґовати їх публіці дома і за граніцями.

Ансамбель має 31 членів і выникнув у 2010-ім році. Меджі членами є 25 співаків і 6 музикантів, котры грають на акордеоні, мандоліні, контрабасі, кларінеті (пищалці), гуслях, ґітарі і хоровім бубні.

Жрідло фотоґрафії: Фейсбуковый профіл ансамблю Русиния. Автор: AIDASTUDIO.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі