Голосник

Шанса на бінґо

0
В неділю 21-го юла будуть проходити на Україні выборы до Верьховой рады. Із бадань, котры ся в остантім часі робили, выходить так, же партія нового презідента Володиміра Зеленьского Слуга народа будь з єдным коалічным партнером, або докінця і сама возьме власти до рук компелтно.

То буде про презідента добре в тім, же буде годен наповно просаджовати свої законы, свої реформы, свої погляды на то, де ся має Україна рушати, окрім того, же ся хоче рушати на Запад. Но буде то і конець алібізма. Вже ся не буде годен выгваряти, же ся штось не дасть. Буде то, покля рахуєме з тым, же партія му буде лоялна, лем в його властных руках. Дотеперь стигнув зробити про імідж державы важны навщівы, по выборах може пустити ся до важной роботы.

Покля выходиме з того, же він сам быв протестом проти дотеперішніх естаблішментів на Україні, пак лоґічно очекуєме, же ся із них поучів і зачне робити політіку іншак. Же зачне головно робити політіку таку, жебы го люди ганебным дебаклом не гнали з уряду по закінчіню мандату так, як погнали своїм голосованьом у презідентьскых выборах Петра Порошенка.

Нас самособов інтересує передовшыткым єден вопрос, і то як буде односити ся ку справам Русинів. Конкретніше, ці порішыть проблем, котрый ся з Українов тягне од їй выникнутя у 1991-ім році і вызнать Зеленьского Київ конечно єден із своїх корінных народів за повноправну народностну меншыну.

Шансу, же ся теперь може штось подарити на благо Русинів мож видіти головно з двох причін. По перше, Володимір Зеленьскый ся, в порівнаню наприклад з Петром Порошенком, явить як автономнішый політік, котрый хоче рішыти справы по новому. Не одходить із драгы інтеґрації на Запад, но проявлює ся як самобытнішый актор, і то теперь не думам на його попередню професію, на політінчій сцені. Сам хоче рішыти проблем із Російов, рішіня проблему видить якбач і іншак як лем стріляньом, докінця проявив інтерес о стрічу з Путіном, хоць затля неуспішно. На дргім боці то не є чоловік, котрый спустив перед Кремльом голову до землі. На московску політіку роздаваня гражданства одповів єднако. І кедь сьме коло той інтеґрації, там собі, ці скоріше або пізніше, буде мусити усвідомоти, і кебы не хотів, же путь веде на Запад лем через дотримованя штандардів, котры ся дотулятють і людьскых ці народностных прав.

По друге, іщі все є можливость, кедьже баданя можуть много раз быти дакус далше од реалных резултатів выборів як бы сьме чекали, же Зеленьскый буде потребовати коалічного партнера. З бадань днесь выходить, же окрім презідентовой партії ся має шансу дістати до парламенту іщі Опозічна платформа – За жывот, Евпроска солідарность бывшого презідента, партія Юлії Тимошенко Отцюзнина і Голос Святослава Вакарчука. Гей, політічны рішіня суть даколи великым несподіваньом. Але было бы барз чудне, кебы ся Зеленьскый по выборах хотів доїднати на коаліції з Порошенком, проти котрого войовав, або з Тимошенко, котра є в політіці скоріше уж лем споминов на Паріж перед тридцятьома роками.

І так нам выходять дві партії – Опозічна платформа і Голос. Комбінація Вакарчука зо Зеленьскым є днесь наконець єднако одкрыта (бо така є на кінцю дня політіка) як і комбінація Зеленьскый – За жывот (хоць є проросійска). Омного веце ся друга можлвиость одкрыє, кедь буде мати платформа вызначно веце процент як Голос. Но і то є далша причіна того, же бы сьме у русиньскім вопросі могли чекати позітівну зміну. Опозічна платформа предці уж перед презідентьскыма выборами одкрывала тему вызнаня Русинів, сімболы той партії было недавно видіти на сцені Дня Русина. Покля бы ся дістала до коаліції з партійов презідента, може прямо в коалічнім договорі жадати, жебы з вопросом Русинів рушало ся, і жебы быв конечно порішеный.

Самособов, карты роздають голосуючі аж в неділю. Аж пак буде мож реално раховати можливости, нелем коалічны, але і тоты нашы. Шанса ту про Русинів є. Но єднако є шанса і выграти міліонове бінґо. В припаді Україны ся бою того, же реалніше буде выграти бінґо, як порішыти наш вопрос. Так то дотеперь было все. Бодай бы єм теперь не мав правду.

Статя была написана як коментарь „Вступне до контроли“ лемківского радія lem.fm.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар