Голосник

Штефан Штець іде на турне з дебутовым албумом

0
Співак русиньскых народных співанок, котрый лем недавно выдав свій дебутовый албум під назвов Полетів бы-м на край світа (оріґ. Poleťiv bym‘ na kraj svita), рихтує в новембрі своє перше турне.

Співак обіцять, же на концертах одпрезентуе співанкы, котры люди знають, но і цалком новы.

На коцертах чуе енерґію

„Концерты мають про мене велике значіня. Стріча із любителями на концертах мі приносить множество енерґії, котру маю намагу назад вернути при каждім выступліню,“ говорить Штець. За його словами не є нич красше як аплавз і спокійна публіка. На концертах го тішыть, же людям може передати дакус зо себе, свойой ідентіты і културы, котру здідив, і о котру хоче поділити ся.

„І кедь мі може не вшыткы розуміють што співам, знам же мі розуміють іншыма чувствами. Хочу быти автентічный в тім, што роблю, і зато співам у своїм материньскім языку, значіть по русиньскы,“ говорить співак.

Народна музика і звізды

В рамках концертів буде выступати і Народна музика Горнад, котру веде Домінік Маніак. Музиканты на турне приготовили дакілько оріґіналных аранжманів. Як повів Маніак, іншпіровали ся традічнов народнов музиков, но заграють і іншы обробкы, котры пасують Штецьови, і на котрых робили цілый рік.

На турне собі Штефан Штець закликав і звіздных гостів. В Братіславі то буде хресна мати нового албуму, словацька композіторка Любиця Чековска, котра має так само русиньске походжіня. Вєдно із Штецьом заграє дакілько русиньскых співанок, котрым Чековска зробила властны музичны обробкы. Выступати в Пряшові з ним буде Петер Бич із своїм Peter Bič Project.

Албум тримать собі першы місця

Штеців дебутовый албум ся цілый час тримать на першых місцях в рамках продайности на Словакії. Шумны реакції дебут здобывать нелем од Русинів, но і од людей з цілой Словакії. В рамак трьох приготовльованых концертів собі го любителі будуть годны выслухати нажыво.

Першый концерт в рамках Štefan Štec Poleťiv bym’ na kraj svita tour 2018 одбуде ся 6-го новембра в Пряшові, в кіні Scala. 10-го новембра буде мож Штеця видіти в Лученці, де концерт привітать Tančiareň a pivovar Franz. Остатній оголешный концерт буде проходити в головнім місті Словакії, в клубі Ateliér Babylon 15-го новембра. Тікеты на концерты мож купити на порталі Ticketportal.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар