Голосник

«Слово» – 10-та неділя по Сошествії Святого Духа – неділя, 9.00 год.

0
В днешім слові задумайме ся над посолством св. пророка Ілії про нашу добу і наш жывот. Хто то быв святый пророк Ілія?

Походив із міста Тесвы в Севернім царьстві. По смерти царя Соломона дішло ку адміністратівному розділіню Ізраільского Царьства на Южне, де зістали два кмені, і северне із остатніма десятьома. Царьом став Єровоам, котрый одділив народ нелем од Єрусалима, але і од Бога, запровадячі поганьскых ідолів. Кедь ся став царьом Ахав, котрого жена Єзавель принесла до Северного царьства култ поганьского бога Ваала, бога плодности вєдно із понад 400 пророками і жрецами, котры ся кормили із їй стола, царь єй в тім підпорьовав. І так тот култ ідолопоклоньства заплавив Северне царьство.

В тім часі выступив пророк Ілія, котрый ся вызначовав великов любвов ку Богу, і ревностьов за Бога Ізраіля. Не бояв ся ани самого царя. На його молитву Бог затримав додж на три рокы і шість місяців. Потім Ілія скликав народ і прихылників Ваала на гору Карміль. Там остро говорить ку народу: Доколи хочете так жыти. Обертати ся на дві стороны? Хто є Бог, того наслідуйте. Дав поставити два жертвеникы про Бога Ізраіля і про жреців бога Ваала. Дав їм можливость прикликати їх бога, но не было жадной одозвы. Потім ку вечеру помолив ся і Бог послав огень із неба, спалив жертву і тым вказав, же він є правдивым Богом. За свою ревность і велику любов ку Богу быв взятый на огнянім возі до неба. Подля традіції мать прийти перед кінцьом світа, жебы голосив народу покаяня.

Святый пророк і нам днесь говорить: Доколи хочете обертати ся на дві стороны? Выберати собі із Божого слова, што нам пасує, а што ся ся не любить выхабляти? Робити компромісы із духом того світа, із гріхом, із діяволом?

Ілія не робив компроміс, стояв твердо. І нас учіть не робити компромісы. Ани втогды, кідь бы нас мали чекати неприємности ці пронаслідованя. Тот світ ся старать релатівізовати Боже слово. Гріх ставлять на рівень закона, выздвигує аморалность, а притім нам хоче наговорити: Тадь то впорядку, Бог предці милосердный, він то розумить. Так хоче тот світ засіяти до нашой душі роздріджене Боже слово.

Будьме подля прикладу пророка Ілії твердыма і некомпромісныма, кедь іде о Божу славу, о вірность його слову і його заповідям. Слава Ісусу Хрісту!

В неділю, 4. авґуста 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 4. авґуста о 15.00 о 20.00 год. і 5. авґуста о 2.00, год. за русиньскым часом.

Фото: Пророк Ілія. Жрідло: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментар