Голосник

«Слово» – 17-та неділя по Сошетствії Святого Духа – неділя, 9.00 год.

0

В тых днях празднуєме праздник Воздвиженія честного Креста. Што то є за праздник? Не є то праздник о Хрістровых страстях, но о Його побіді.

Коли святый Констатін дав слободу Церькви, тогды його мати, свята Гелена, выбрала ся до Єрусалима глядати святый Крест. З Божов благодатьов ся їй то подарило на місці, де колись была Ґолґофта, і де імператор Адріян дав поставити ідола Афродіты – богыні аморалности. Она дала звалити поганьскый храм і рокопати тото місце. І кідь нашла святый Крест, патріарха Макарій го потім торжественно выздвигує і благословить ним вшыткы світовы стороны. І так быв установлений праздник Воздвиженія честного Креста. Тото воздвиганя Креста мы повторяме по нашых церьквах, жебы вказати цілому світу побіду Креста.

Тото было передображено уж в Старім Завіті: Мойсей, кідь крестообразно вдарив по Червенім морі паліцьов, мідяный гад на пустыні, народ ідучій в знаку креста по пустыні і далшы передобразы, котрых бы сьме могли найти много. Но Ісус говорить іщі о єдній побіді Креста, тій дефінітівній, при Його другім приході, кідь вкаже ся знак Сына чоловіка.

І так не бійме ся голосити ку побіді креста. Робме на собі знак креста, кідь переходиме коло церькви ці креста при дорогах. Но най наше голошіня ся буде правдиве, не формалне. Памятайме, же Бог видить не лем наше вонкашнє, но і наше внутрішнє. Жебы сьме і мы мали участь на побіді честного Креста. Слава Ісусу Хрісту!

В неділю, 1. жолтня/октобра 2017 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 1. жолтня/октобра 2017 р. о 15.00, 20.00 год. і 2. жолтня/октобра  o 2.00 год. за русиньскым часом.

Фото: Роспис в Ґрекокатолицькій церькви Покрову Пресвятой Богородіці в Лабовій. lem.fm

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Коментар