Голосник

«Слово» – 26-та неділя по Сошествії Святого Духа – неділя, 9.00 год.

Днешнє слово євангелія нам говорить о чоловікови, котрому поле щіро зародило. А він так роздумує: Што робити? Де тото вшытко дати? Хоче збуряти свої сыпанці а поставити векшы. А потім собі говорить, кедь тото буде зроблено, повім своїй душі, же мать богатства на многы рокы. Теперь може їсти, пити, веселити ся.

Но приходить реакція, котру не чекав. Бог йому говорить: Нерозумный, іщі той ночі пожадають од тебе твою душу. А Ісус закінчує тот образный приклад словами: Так буде із каждым, хто зберать богатсво про себе, а не є богатый перед Богом. Тот чоловік быв засліпленый прягнутьом мати веце. Не видів то, же тото вшытко дістав не своїма заслугами. Ниґде ся не говорить, жебы він мозолив, намагав ся. Але поле зародило, то є із Божой доброты і Його благословліня земля принесла плоды. Він тото вшытко привластньовав лем собі а хотів выхосновати лем про себе. Не дяковав Богу за то, же йому дав таке богатсво, котре може выхосновати про добро многых. Думав лем на себе. Обіцяв собі довгый жывот, бо мав вельо богатства.

Ісус указує в днешнім слові, же жывот чоловіка не залежыть од великости того, што мать. Тым образным прикладом Ісус учіть і нас, жебы за вшытко дяковати Богу, а старати ся выхосновати тото, што маме на хосен другых. Втогды збераме богатство, котре є богатством і перед Богом. А за котре Ісус обіцять вічну нагороду, кідь тото, што мы зробиме другому, будьяке добре діло, Він приписує як зроблене Йому самому. Слава Ісусу Хрісту!


В неділю, 15 децембра 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 15 децембра о 12.00 і 16 децембра о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

 

Шеруй.

О авторі

Avatar

Коментарі