Голосник

«Слово» – 6-та неділя по Сошествії Святого Духа – неділя, 9.00 год.

0
Дорогы радіослухачі, Ісус Хрістос, як выздравив двох людей опанованых демонами, приходить до свого міста. Котре то є, векшына отців є той думкы, же Капернаум, де Ісус зробив найвеце чудесных діл, і найвеце ся там стримовав.

Кедь подля свойого звычаю учів в домі, принесли невладного чоловіка, котрого несли четверо мужів. Іншы євангелисты додавають, же не могли про народ войти до дому, так вытягли го на стріху, зробили діру і спустили перед Ісуса. Кедь він видів їх віру, говорить невладному: Сыну, небій ся, одпущають ся тобі гріхы. Ісус видів не лем само діло, што они робили. Він видів, кедь іщі лем выходили, видів як вышли на стріху, видів до їх сердця. Но дакотры із учітелів закона роздумовали у своїх сердцях: Він ображать Бога. Но Ісус знова указує своє божество. Він видів і їх думкы, і повів їм: Чом так злобно роздумуєте у своїх сердцях? Іншы не виділи, о чім они роздумують, но перед Ісусом тото не зістало скрытым.

Тото є і про нас наука днешнього євангелія. Памятати не лем на нашы діла ці слова, што можуть видіти і іншы. Но тыж треба памятати, же перед Богом не суть скрыты ани нашы думкы. Прото четвертый псалом нас вызывать при іспыті совісти: Што говорите у своїх сердцях, на вашых ліжках каяйте ся! Раз будеме здавати слово перед Богом, не лем за нашы слова ці діла, але і за нашы думкы. Бо каждый гріх зробленый словом ці ділом наперед зачінать у нашім внутрі, в нашій думці.

Мерькуйме прото, жебы і нам раз Ісус не повів: Чом так злобны были роздумы твойого сердця? Най слова днешнього євангелія будуть про нас напомянутьом, жебы в каждій сітуації дня, памятати на Божу присутность і Божу всевидучость. Слава Ісусу Хрісту!

В неділю, 8. юля 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 8. юля о 15.00 о 20.00 год. і 9. юля о 2.00, год. за русиньскым часом.

Фото: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

 

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментар