Голосник

«Слово» – Перша постна неділя – неділя, 9.00 год.

0
По чітанях Першого тыждня Великого посту, котрый завершуєме, ся говорило о прекрасній гармонії першобытного світа. Бог вшытко сотворіня приготовляв про чоловіка, котрого сотворив як вершыну сотворіня, кедь было вшытко приготовлене. Сотворив го із любви.

А окрім того дав выроснути пекрасній загороді Едем – солодкость, де чоловік мав перебывати у великій радости і близкости Бога.

Так і про нас Бог приготовив тот святый час. Св. Василій го назвав часом Боголічіня, часом Божой благодати на очіщіня нашой душы. Маме молитву, поклоны, піст. Нашы літурґічны книгы нас вызывають постити ся постом тілесным і постом духовным. Піст тілесный зіставать лем при тілі. Хто ся заспокоїть лем з тым, нич великого не робить. Наше богослужіня нам говорять, жебы не хвалити ся лем такым постом, бо втогды душа, кедь про ню не буде нагодов ку покаяню, направліню свого жывота, буде подобна демонам, котры ниґда не їдять. Но тыж можеме часто чути, же стачіть лем постити духовно, од гріха, страстей, привязаности ку тому земному. Но св. Василій ту знова говорить: Хто сі думать, же буде робити правдиве покаяна, а притім не тримати на узді свій жалудок, такого намаганя є даремным. Прото мать быти тілесный піст споєный із духовным.

Перша постна субота, або і Субота коливы, нам говорить, як Бог цінить правдивый піст. Кедь імператор Юліян хотів зневажыти піст покропліньом стравы кровльов пожертвованов в поганьскых храмах. Но Бог послав мученика Теодора Тірона, котрый єпіскопови міста наказав зварити пшеніцю, котра ся в його краю называла коливо. На памятку того і мы посвячуєме коливу на Першу постну суботу. Мать нам припоминати, як важно є про нас не забывати на правдивый хрістіаньскый піст – тілесний і духовный.

В днешнім євангелію, кедь Ісус стрітив Натанаїла, говорить о нім: Смотьте, то справды Ізраілтян, в котрім не є фалшивости. Кедь тот ся чудує, Ісус одповідать: Іщі скорше як тебе Філіп закликав, я тебе видів під фіґовым стромом.

Приймиме тото запрошіня посту, выхоснуйме го про нашу душу. Бо Перед чоловіком можеме грати, ці дати сі маску, но перед Богом не можеме. Він проникать вшытко і найтайнішы загыбы нашой душы. Постьме ся прото постом і тілесным і духовным. Жебы так і о нас могли платити тоты слова: То правдивый хрістіян, в котрім не є фалшивости. Слава Ісусу Хрісту!

В неділю,  17. марца 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 17 марца 15.00 і 20.00 год. і 18 марца о 2.00, год. за русиньскым часом.

Фотоґрафія: Св. Теодор Тірон. Менолоґіон Василія II. Жрідло: wikipedia

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментар