Голосник

«Слово» – Праздник свв. апостолів Петра і Павла – неділя, 9.00 год.

0
Того тыждня сьме празндовали память святых верьховных апостолів Петра і Павла. Посмотьме на даякы моменты їх жывота.

Што їх спаяло, што мали розділне і што може їх праздник повісти до нашого жывота. Петро быв рыбарьом. Цілый його детеперішній жывот ся крутив коло Ґалілейского моря і ловліня рыб. Аж єдного разу Хрістос приходить і кличе го: Подь за мнов. Петро зохабив вшытко і ішов за ним. Щіро полюбив Хріста і щіро увірив його слову. Коло Кесарії Філіповой, кедь ся Ісус звідує учеників, за кого тримають люде Ісуса, Петро перед вшыткыма выголосив: Ты есь Хрістос, Сын жывого Бога. Ісус го назвав блаженым, і говорить му: Ты Петро і на тім каміню (то є каміню твойой віры, твого вызнаня, же я єм Хрістос, котрый зышов на землю про спасіня людей) я збудую свою Церьков, а ворота аду єй не одолають. Но в часі терпінь Петро острашыв ся і маленькой дівчіны – служніці, і одрік ся три раз од Хріста. Но такой приношать покаяна, і по воскресіню Ісус троякым вопросом: Любиш ня? – привертаь йому назад апостолскый уряд. По Сошествії Святого Духа Петро сміло голосить Хріста а наконець і вмертаь в Римі мученицьков смертьов. Быв роспятый долі головов.

Апостол Павел, перед тым Савл, быв сыном римского граждана, быв фарізейом. Спочатку пронаслідовав тых, якы увірили. Но кедь ся му перед Дамаском появив Господь, із Савла ся став Павел. Він быв запаленый любвов ку Хрістови, а нич інше го не інтересовало, лем успішно завершыти діло, котре од Хріста прияв. Нич го не могло одлучіти од любви Хріста. Ани пронаслідованя, ани терпіня, ани голод, ани смерть. Свою любов засвідчів мученицьков смертьов в Римі. Но як римскый граждан не быв роспятый, але стятый мечом.

Свв. апостолы указують нам велику любов, котру мали ку Хрістови, велику надію і велику любов. Тыж суть прикладом про тых, котры або суть далеко од Бога, або і тых, котры выступили высоко в духовнім жывоті а потім упали. Зато, абы ани єдны ани другы на падали до безнадії. Най і нас утверджують в щірій любви, вірі і надії. Слава Ісусу Хрісту!

В неділю, 14 юля 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 14 юля о 15.00 і 15 юля о 2.00 год. за русиньскым часом.
 Фото: День святых славных і всехвальных первоверьховных апостолів Петра і Павла, pixabay

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Коментар