Голосник

«Слово» – Восьма неділя по Сошествії Святого Духа – о розмножіню хлібів на пустыні – неділя, 9.00 год.

Як ученикы росповіли Ісусови о смерти Йоана Крестителя, Ісус насів до лодькы і одплавив ся на пусте місце. Но народ дізнав ся о тім і як вышов із лодькы, увидів народ, посановав їх і выздравляв їх хворых. Но головно оголошав їм царьство Боже і дорбру новину.

Як настав вечур, ученикы просять Ісуса, жебы розпустив народ, бо місце є пусте. Но Ісус їм говорить, же не треба одходити, най дадутьїм їсти ученикы. Они опонують: маме лем пять хлібів і дві рыбы. Ісус наказав принести і робить чудесне діло розмножіня. Вшыткы їли і понаїдали ся. Было їх пять тісяч мужів окрім жен і дітей. Коли народ видів тото чудесне діло, говорив: То справды пророк. Хотіли його взяти і зробити царьом. Народ не порозумів. Ісус не зробив тото чудесне діло лем так. Хотів їх научіти. Жебы довіряли Богу в каждій сітуації і од земного хліба підняли їх очі ку небесному. Так находиме в цілій історії Старого і Нового завіта. Розмножіня хліба было передобразом розмножіня небесного хліба. Тым хлібом є сам Господь, котрый ся давать каждому, хто приходить ку ньому.

А так і нас тото слово учіть, же Бог нам давать многы дары про наше тіло, но головно давать нам дары про нашу душу. Жебы сьме не зіставали поглядом лем на тім земнім, котре є скоро минаюче і дочасне, але піднимали ся ку небесному, котре вічне і непоминаюче. Слава Ісусу Хрісту!

В неділю, 11 авґуста 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 11 авґуста о 15.00 і 12 авґуста о 2.00 год. за русиньскым часом.

 Фото: Джованні Ланфранко: Чудо хліба і рыб, wikimedia

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

 

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментарі