Голосник

«Слово» – Закхейова неділя – неділя, 9.00 год.

Днешня неділя называть Неділя Закхея, о котрім нам говорить євангеліє од св. Лукы. Ісус пришов до Єріхона і переходив через нього. Там быв чоловік на імя Закхей, головный мытарь і великый богач.

Він хотів увидіти Ісуса, хто він є, но быв малого росту, і так вышов на фіґовый стром. Но скорше як він збачів Ісуса, Ісус го закликав: Закхею, зыйдь такой долов, бо днесь мам быти в твоїм домі. Закхей го прияв із радостьов. Він справды щіро одніс ся ку Хрістови. Його радость не была наоко, він сі усвідомльовав свою грішность. А Ісус наперек тому хоче прийти до його дому. А тото стритнутя із Ісусом змінило радікално його жывот. В Ісусови як в дзеркадлі увидів цілу правду о собі. Вшытко зло, што зробив. А Ісус го не одсудив. Многый народ высмівав ся із Закхея, кедь го виділи на стромі, но Ісус не высмівав ся із нима. З голосом повным любви кличе го долов. Закхеови ся открыли внутрішні очі. Скричав: Господи половину свого маєтку дам бідным, а кедь я дакому зробив шкоду, верну йому штири раз веце. А Ісус, як Бог, видів зміну в сердці Закхея і прото говорить: Днесь пришло спасіня до того дому, бо і він є сыном Авраама. Бо Сын чоловіка пришов глядати і спасити тото, што пропало.

Майме і мы тото силне прягнутя видіти Ісуса, стрітити ся з Ним. Не смотьме на высміваня діявола, того світа, ці і холодных хрістіанів. Смотьме лем на Ісуса внутрішніма очами. І мы зачуєме тот ласкавый голос Спасителя: Зыйдь долов, днесь мам быти в домі твойой душы. А перебываня в душі Хріста значіть спасіня. Бо в нім, як в дзеркадлі увидиме наш жывот. Спознаме правду о собі, котра нас приведе ку правдивій слободі. Бо далшы слова Ісус і нам адресує: Днесь пришло спасіня до того дому. Слава Ісусу Хрісту!

В неділю,  10. фебруара 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 10. фебруара 15.00 і 20.00 год. і 11. фебруара о 2.00, год. за русиньскым часом.

фото: Ісус і Закхей. Собор Св. Марка . Жрідло Wikipedia.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Avatar

Коментарі