Сполочный Святый вечур в Гуменнім уж по десятый раз

Містна орґанізація Русиньской оброды на Словеньску в Гуменнім уж по десятый раз зорґанізовала подію під назвов Русиньскый сполочный Святый вечур. Подія проходила в суботу 21-го януара 2017-го року.

На столах ани тот раз не браковали традічны стравы, капустніця, бандурковый шалат ітд. Співали ся колядкы а зазвучало і духовне слово, од православного пароха Петра Гуменика.

„Сьме єдна велика родина, стрічають ся ту шторік майже тоты самы люди. Днесь є їх цілково сто,“ повіла про словацькый денник Korzár Ева Кунцова, котра є председкыньов Містной орґанізації Русиньской оброды в Гуменнім. Гуменне має в рамках містных орґанізацій РОС єдну із найвешкых членьскых баз.

В рамках події выступала женьска співацька ґрупа Зорніця, котра діє під містнов орґанізаційов, выступали і Мужска співацька ґрупа Гачуре ці Рунянка із Русины. Свій талант одпрезентовали і школярикове із Матерьской школы на ул. Тжебічскій в Гуменнім, в котрій ся учіть русиньскый язык. До школкы не ходять лем гуменьскы діти, але і діти з околіці, котрых родічі хотять, жебы ся навчали в материньскім русиньскім языку.

Окрім того, же в суботу Містна орґанізація Русиньской оброды на Словеньску в Гуменнім зорґанізовала Святый вечур уж по десятый раз, Кунцоваа інформовала, же будуть в тім році продовжовати і в далшых подіях, котры ся роблять рокы і освідчіли ся. Гуменне чекать русиньскый Маялес, фестівал, но выдумають ся як все і даякы новы події.

Жрідло фотоґрафії: Мірослава Масіцова

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА