Голосник

Споминаме річницю смерти владыкы Адама

0

Докладні рік тому попращали сме Высокопреосвященнійшого Кыр Адама, Архієпископа Перемышльского і Новосандецкого. В понедільок, 24. липця/юлия т.р., в церкви св. Владиміра Великого в Креници проходила заупокійна Служба Божа в першу річницю смерти владыкы. Богослужыням проводил епископ Паісий. Присутны были священникы більшости парохій перемышльско-ґорлицкой єпархіі, монахы з Высовой, а окрем того і духовны споза єпархіі. На Божественну Літургію зъіхали ся люде з ріжных сторін світа, близкы владыці. Мож было почути казаня епископа Паісия, в котрым оповіл о апостольскым жытю владыкы Адама. Припомнул, што был то чловек, котрий не смотрячы на тяжкы часы, в якых пришло му жыти, знал перейти вшыткы трудности. Діяльніст владыкы Адама причынила ся до розвитку православя на Лемковині. Його старанями покликано до жытя новы парохіі і побудувано новы церкви.

По Св. Літургіі одслужено панихіду в каплици під олтарном частю церкви, де находит ся гробовец з тілом владыкы. Пак, свою проповід выголосил о. Владимір Канюк. Напомнул, што в ден тот споминаме тіж памят блаженной великой княгыні Ольгы, а потім навязал до слів, котры владыка Адам хоснувал в своіх гомілетиках. Подякувал тіж вшыткым за присутніст. Cловами, поясняючыма значыня світского і монашого імен владыкы, повіл: «Імя Александер значыт тот, котрий є хоронительом люди, Адам – тот, што зо землі взятий. А мы, Лемкы, з том земльом так звязаны. Хоц она камениста, але наша рідна».

Позерайте долов за знимками (автор Миколай Ґрич).

Шеруй.

О авторі

Наталія Клинковска

Коментар