Голосник

Станіслав Монюшко, «З повагом», просит Павел Малецкій – неділя, 20.00 год.

Вшыткы знают, што скомпонувал «Гальку», «Страшный Двір», был вітцьом польской оперы і його твар через даякій час была на банкноті 100 тис. зл. Де подорожувал? Де стоят його памятникы? Кілько опер скомпонувал?

Вельоx істориків, музиколоґів ХІХ і ХХ ст. называло Станіслава Монюшка (1819-1872) ґеніяльным композитором. Стал ся творцьом-символом, хоц його шырока творчіст не єст добрі знана. На все уж в музичных і театральных репертуарах загостили лем дві скомпонуваны ним оперы і пару пісен. А Монюшко то артиста, якій може похвалити ся доробком коло 300 творів, в тым девятьох опер, трьох балетів, осмох опереток, пятьох месс, 268 пісен.

Найбарже знана статуя Монюшкы стоіт на варшавскым Театральным Пляци, перед Великым Театром. Вырізбленого Монюшку стрітити мож і в Катовицях, в Торуню, Ченстохові, Рацібожы і в Лодзі. Памятникы находят ся і поза границями Польщы.

Монюшко, як на чловека жыючого в ХІХ ст., знал дост великій кавалец світа. Мешкал в Міньску, Вільнюсі і в Варшаві. Через штырі рокы жыл в Берлині, іздил до Санкт-Петерсбурґа, Парижа, Прагы, Москвы і Братиславы.

За жытя Монюшко дождал ся выставліня своіх опер в Братиславі, Празі, Москві і Санкт-Петерсбурзі. Зо спектаклями композитора іздила по світі оперова співачка, а пак режысерка Мария Фолтин, была з нима в Зъєднаных Штатах Америкы, Мексику, Бразилиі, Портуґалиі, Іспаніі, Швециі, Румуніі, Болгариі і Турциі. В єй пєсах співали найчастійше місцевы співакы, обовязково облечены в польскы народны кроі.

В проґрамі почуєте м.ін. фраґменты з оперы «Галька», знаны пісні, фортепіяновы композициі ци фраґменты з «Остробрамской Літаніі» та і дакус знаных творів інчых клясиків.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі