Голосник

Сумар дня на 13. січня/януара 2020 р.

Приносиме вам сумар медияльной ґрупы ЛЕМ.фм+ на ден 13. січня/януара 2020 р.


Посол Рышард Ґалля проти зменшыню буджету на меншыны

В середу 8. січня/януара в польскым Соймі проходила дебата над буджетовым законом. Голос в справі м.ін. высокости фінансуваня для нацийональных і етнічных меншын взял посол Рышард Ґалля. Част 43. діл 921. проєкту закону о буджеті односит ся як раз до нацийональных і етнічных меншын. В році 2020 пропонує ся в тій позициі передати на культуру і охорону нацийональной дідовизны, значыт на радийову, телевізийну діяльніст, як і інчы задачы в области культуры, нецілых 15 мілийонів злотых. Порівнуючы – єст то сума о понад мілийон злотых меньша як влони. Посол Рышард Ґалля вчас дебаты ствердил, же така сума не совпадат з потребами нацийональных і етнічных меншын в Польщы. Подля посла Ґаллі, одповідня квота повинна быти дуже збільшена.

Велика Оркєстра Святочной Допомогы грала в цілій Польщы

Вчера, т.є. в неділю 12. січня/януара, в цілій Польщы проходили подіі і концерты звязаны з 28. фіналом Великой Оркєстры Святочной Допомогы. З той нагоды в Вєлічці мож было послухати концерт ансамблю Загіря, котрый запрезентувал народны і авторскы творы. Ансамбль, котрого лідерком і фронтменком єст артистка лемківского походжыня Моніка Ліс, выконує традицийны народны лемківскы пісні в сучасных аранжациях та авторскы творы, котрых мож послухати на платни «Танці душы». Основателька і вокалистка ансамблю, Моніка Ліс, котра уж перше писала тексты співанок і награла три платні, в 2016 році отримала нагороду Ars Quaerendi Маршалка Малопольского Воєвідства, завдякы чому зродил ся альбом «Танці Душы». Жебы сотворити ансамбль, Моніка Ліс глядала осіб, котры мают подібны музичны преференциі і разом хотят сохраняти лемківску музику од забытя. Ансамбль має в плянах концертову трасу і награня наступного альбому.

Монашкы з Турковиц в Снині

Тіж вчера, 12. січня/януара, в Культурным Домі в Снині мож было послухати коляды. Єдныма з участників на концерті коляд і народных звыків «Од Щедрого вечера до Нового Рока» были монашкы з польского православного монастыря Покровы Пресвятой Богородиці в Турковицях. Турковицкы сестры брали тіж участ в ранній Божескій Літургіі в храмі Вознесіня Господнього в Снині. Православный женьскій монастыр в Турковицях єст штораз частійше одвиджаный поломниками зо Словациі, вельо молодых дівчат приізджат на пару днів, жебы видіти монаше жытя. Єдном з тамтышніх монашок єст сестра Софія (Єшкова), котра походит з Пряшова.

Ранкінґ ліцеів і техніків

Знаме уж, котры місця заняли школы в ранкінґу ліцеів і техніків часопису «Перспективы» 2020. В малопольскым воєвідстві першы три місця заняли краківскы ліцеі, з чого першый, V Загальноосвітный Ліцей імени Авґуста Вітковского, занял барз высокє, бо третє місце в ранкінґу загальнопольскым. Четверте місце в воєвідскым ранкінґу занял Академіцкій Загальноосвітный Ліцей ім. Болеслава Хроброго в Новым Санчы, отримуючы єдночасно шістдесяте місце в загальопольскым ранкінґу. І Загальноосвітный Ліцей ім. Марціна Кромера в Ґорлицях занял 31. місце в малопольскым воєвідстві, а 370. в Польшы. Тот результат єст о 130 місц гіршый в скали цілой Польщы – влони ґорлицка середня школа была на 240. місци. Першы три місця в тогорічным ранкінґу ліцеів заняли школы в Торуні, Варшаві і Кракові. Перше місце серед техніків в малопольскым воєвідютві заняло технікум номер 7 в Новым Санчы, котре нашло ся на высокым, другым місци в загальнопольскым ранкінґу, зараз за Технікум Мехатронічным но. 1 в Варшаві. Наступны три місця в воєвідскым ранкінґу заняли школы в Кракові.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі