Голосник

Сумар дня на 24. грудня/децембра 2019 р.

Приносиме вам сумар медияльной ґрупы ЛЕМ.фм+ на ден 24. грудня/децембра 2019 р.


Передвелийна стріча в Рускій Бурсі. Концерт малой і великой Терочкы

В найблизшу пятницю, 27. грудня/децембра, в Рускій Бурсі в Ґорлицях, як што рока, проходила буде Велийна Стріча, котра зачне ся о 16.00 год. Очывидно мож прити скорше, жебы разом варити велийны стравы і прикрашати яличку. На початку выступлят дві ґрупы ансамблю Терочка, што діє при Стоваришыню «Руска Бурса» в Ґорлицях. Буде тіж можна послухати короткой прелекциі на тему різдвяных звыків, яку выголосят ученикы середніх шкіл. Вечером, при звуках коляд буде нагода побесідувати та вымінити ся святочныма звыками з ріжных стран Лемковины або поспівати. Стріча од років тішыт ся популярністю серед жытелів цілого ґорлицкого повіту і не лем. В імени орґанізаторів – сердечні просиме.

Лемківскы коляды в Домініковицях

Хоральне Стоваришыня «Belfersingers» просит на 18.00 год. в суботу, 28. грудня/децембра, до Сельского Дому Культуры в Домініковицях на різдвяно-новорічный концер. Подія має харитативный характер і возникла з думком підпорити родину Кнапіків з Паґожыны. Камеральный хор Belfersingers запрезентує ся з богатым проґрамом коляд та лемківскых і погіряньскых пісен. Хор был основаный в 2002 році з ініциятивы учытелів з ґорлицкой землі. Днес має 20 членів, а дириґентом єст Лукаш Вудецкій. В його обшырным репертуарі находят ся творы так давной, як і модерной музикы, польской і чужой, народной і джазовой. Хор концертує не лем в Польщы, але і за єй границями, нп. на Словациі.

І в Ґорлицях ярмакували

В остатній вікенд в трьох містах малопольского воєвідства проходили Малопольскы Різдвяны Ярмакы. Єдном з місцевости, в котрій гостили члены сіти Малопольской Культуровой Спадковины, были Ґорлиці. В тій части державы різдвяны ярмакы были барз популярном святочном традицийом. Можна на них было купити реґіональны стравы та ручні рыхтуваны прикрасы і нетиповы дарункы. Наймолодшы мали нагоду стрітити святого Миколая, а пак взяти участ в варштатах прикрашаня перників або в святочных забавах. Выступ дал тіж фольклористичный ансамбль Бескіды з Домініковиц, котрый запрезентувал різдвяны звыкы в концерті «З козом по коляді». На рынку явил ся тіж жывый вертеп, а вечером проходила Ґорлицка Велия. В часі ярмаку ведена была і харитативна акция для жытеля Загірян.

Желаме вшыткого доброго!

За григорияньскым календарьом выпадат днес ден велиі Рождества Христового, святкуваного окрем християн західньой традициі і вірныма декотрых східніх Церкви, котры ідут за новым стильом. Зато вшыткым слухачам, любителям радия, котры святкуют Різдво уж тепер, желаме вшыткого доброго і предовшыткым смачной велиі при родинным столі.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі