Голосник

Сумар дня на 3. жолтня/октобра 2019 р.

Приносиме Вам сумар медияльной ґрупы ЛЕМ.фм на ден 3. жолтня/октобра 2019 р.

Тот вікенд Лемківска Творча Осін

Уж в найблизшый вікенд одбуде ся XXVII Лемківска Творча Осін. Імпреза проходяча в днях 5. – 6. жолтня/октобра буде присвячена як раз памяти Будителя Александра Павловича, котрого 200. річницю народжыня припоминаме того рока. Подія зачне ся о 15.00 год. звиджаньом Ізбы Памяти Івана Русенка, котра містит ся на першым поверсі Руской Бурсы в Ґорлицях. Проґрамову част першого дня отворят доповіди др габ. Олены Дуць-Файфер і Петра Мурянкы до річницьовой темы. По них, за головный стіл засядут запрошены творці з Польщы, Словациі і Украіны. Ґорлицку част прикрасят выступы діточой ґрупы Міні Терочка, співачка Наталька Криничанка, гіст з Украіны і солисты ансамблю Біловежанка. Другій ден буде в цілости орґанізуваный на Пряшівскій Руси. З огляду на річноцю Павловича, Осін буде проходила в місцях, з котрыма звязаный был Будитель. Там тіж Лемкы повандруют упамятнити його особу. Найперше делеґация піде поклонити ся до села Шарискє Чорне, в котрым 19. вересня/септрембра 1819 р. Павлович пришол на світ. Другым пунктом упамятнінь буде Свидник, де до смерти был він парохом. Посліднім пунктом буде Біловежа, де перше так само был настоятельом. О 14.00 год. в Домі Культуры зачне ся ґальовый концерт. Выступлят місцевый ансамбль Біловежанка, Терочка з Лемковины, як тіж дальшы ансамблі і індивідуальны выконавці.


Медальйон Ганкы Сервіцкой

О тыжден, в четвер 10. жолтня/октобра Словацкій Народный Музей – Музей Русиньской Культуры в Пряшові просит на Медальйон русиньской осібности Ганкы Сервіцкой. Сервіцка належыт медже єдну з дам русиньской народной співанкы. Співат не лем народны пісні, але так само духовны. Выдала платні з русиньскыма колядками. О 17.00 год. в просторах русиньского музею зачне ся культурный проґрам. Заспіват в ним сама Ганка Сервіцка при музичным супроводі Народной ґрупы Дрібна. В проґрамі є так само презентация, а пак бесіда нт. жытя і творчости Сервіцкой. Куратором медальйону єст Петро Кімак-Фейко. Дискоґрафія Сервіцкой чыслит парунадцет платен. В своій сольовій карєрі належала і до ансамблю ПУЛьС.


Біциґльовый райд по Лемковині і Пряшівщыні

Для любителів біциґльовых прогульок маме пропозицию на неділю 13. жолтня/октобра. На Лемковині пройде четверый Роверовый Райд по Низкым Бескіді. Траса чыслит 121 км і близко 2000 метрів вверх. Орґанізатором акциі єст ґорлицкій біциґльовый склеп “Остре Колесо”. Выізд зачне ся коло 9.00 год. при склепі в Ґорлицях. Коло полудня участникы повинны быти уж в Бардийові. Там передвиджено короткій одпочынок. Першый одтинок з Ґорлиц буде вюл до Баниці коло Ґладышова. До того моменту вшыткы участникы старают ся іхати разом. Од Баниці до Бардийова каждый годен нашмарити своє темпо. Назад участникы райду вырушат з бардиівского рынку. Пут з Ґорлиц до Бардийова чыслит більше як 70 км. Записувати ся мож на сайті www.ostrekolo.com.pl.


Карпатска вышыванка в Команчы

Православна Парохія Покровы Пресвятой Богородиці в Команчы, ансамбль Лем-Мы з Команчы та місцевый Ґмінный Осередок Культуры просят на подію під назвом Карпатскы Вышыванкы, яка одбуде ся 14. жолтня/октобра. Понедількова стріча зачне ся о 10.00 год. од Божеской Літургіі на парохіяльный праздник. Співал буде хор Ірмос – хор православной перемышльско-ґорлицкой єпархіі. По богослужынях о 13.00 год. в ремізі команецкой протиогньовой стражы зачне ся культурный проґрам. Буде выстава карпатского крестикового вышываня. Наконец выступит вокальный ансамбль Лем-Мы, котрый в своім репртуарі має лемківскы народны пісні.

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі