Голосник

Таємниця руской буркы вкінци розвязана!

Вчас порядковых робіт на поді, рыхтуючых будинок Руской Бурсы під Лемківскій Інститут, ремонтова екіпа зробила сенсацийне одкрытя. Під дилинами найдено пляскату скриню з таємныма річами. На перше пізриня выглядало то на купу рянд, але по розложыню і закликаню присутных на час ремонту бурсаків… вшыткы остолпіли. Одраз было знатя, же нашол ся страченый лемківскій Святый Ґрааль.

В минулым місяци вчас зниманя деревяной підлогы на поді Руской Бурсы в Ґорлицях, робітникы спостерегли, што по під дошками, медже стропами схована є гейбы скриня. Лякаючы ся, што може то быти штоси вартістнe, закликали члена заряду Стоваришыня Руска Бурса, котрый піднял рішыня, жебы скриню вытягнути і перенести до бібліотекы.

В меджечасі закликано решту членів заряду, жебы комісийні провести отворіня скрині. З биючым серцьом одкрыто віко. Присутны сподівали ся, што найдут гын дакы папері, але вказало ся, што были то якісы лахы. В звязку з тым, што не до кінця знали, што то може быти, рішено возвати експерткы.

Коли пришли, одраз зідентифікували артефакты. Першым была леґендарна руска бурка з, што найменше, ХVII ст. Был то свого рода сукняный плащ, котрый одівали жытелі Галицкой Руси з моментах загорозы. Бурка мала мати маґічны приметы. Слава руской буркы так ся рознесла, што співали о ній аж і запорожскы Козакы, котры в піснях мрияли, же даколи поведе ся ім єй облечы і будут не лем свобідны, але і безпечны.

Специялисты в обшыри штукы та літературы думают, што хоц славны рускы буркы загыбнули, то і так тото облечыня хоронило Русинів, лем уж в симболичным вымірі.

Ниже презентуєме фраґмент експертизы.

Другым, не менше шокуючым одкрытьом был транспарент, котрый розвинули войска Максима Кривоноса вчас обліганя Львова в 1648 році. Його зміст был слідуючый:

Не сме сконфліктуваны з Богданом Ґамбальом.

Дальшы покликаны експерткы задумували ся, кым є Богдан Ґамбаль…

Ждыйте дальшых донесінь.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі