Голосник

Цмонтері І Світовой Войны – выстава знимок

18. листопада/новембра в Конференцийн0-Выставенничым Осередку «Каштель в Шымбарку» буде проходил вернісаж выставы пн. Цмонтері І Світовой Войны. Буде то фотоґрафічна выстава, вказуюча воєнны цмонтері та місця памяти звязаны з подіями І Світовой Войны та Ґорлицкой Битвы.

Своі знимкы презентувати будут: Яцек Косіба, Казімєж Стец та Барбара Засовска. Перший з них, Яцек Косіба, фотоґафійом занимат ся од 1956 р. Єст школений в тій професиі. В 1978 р. отримал званя інструктора фотоґрафіі ІІ катеґориі, котре было надане Міністерством Культуры і Штукы. Од 1963 р. єст членом Ґорлицкого Фотоґрафічного Товариства, а од 1978 р. – Сандецкого. Брал участ в вельох выставах, головні в Польщы, його знимкы были нагороджуваны. Другом особом, яка на знимках презентувала буде цмонтері І Світовой Войны буде фотоґраф з Ясла – Казімєж Стец. Од парох років аматорско занимат ся робліньом знимок. Гоббистичні документує, хоснуючы апарат, цмонтері з І Світовой Войны, якы находят ся на обшыри Західньой Галичыны та стары лемківскы цмонтері, тіж жыдівскы кіркуты. Окрем выміненых, любит фотоґрафувати деревяну архітектуру, головні церкви, часом природу. Барбара Засовска, остатня з трьох осіб, якой знимкы буде мож обзерати од пятниці в Каштели, то ґорличанинка о вельох заінтересуванях. Фотоґрафує, різбит, малює. Єст авторком парох індивідуальных выстав, брала участ в вельох ґруповых. Темом цмонтерів з І Світовой Войны заінтересувала ся вчас пленеру, веденого світовой славы фотоґрафіком Боґданом Конопком в 2013 р.

Цмонтері з І Світовой Войны то не лем місця вічного спочываня жолнірів. Каждий з тых цмонтерів єст ділом штукы. Проєктуваны были через выдатных творців – архітектів, малярів і різбярів. Сут свідоцтвом одвагы і посвячыня десяток тисячів жертв Великой Войны, без огляду на приналежніст до арміі. На єдным цмонтери хованы были попри собі жолніры австрийской і росийской армій, а были то рекруты ріжных нацийональности, жытелі великой Европы. В Низкым Бескіді находят ся два з єденадцетьох цмонтерных округів, якы в роках 1915-1918 обняли цілу Західню Галичыну. Роками были забыты, попадали в руіну, але помалы сут ремонтуваны і одновлюваны, завдякы чому вельо з них остало уж сохраненых і приверненых до історичного краєвиду полудньово-східньой Польщы.

Вернісаж выставы буде проходил 18.11 в Каштели в Шымбарку, початок вернісажу о 18.00 год.

Фот. горі: beskid-niski.pl

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментарі