Упамятніня жертв Сребрениці

11. липця/юлия 2017 р. в 22. річницю масакры в Сребреници в Босніі і Герцеґовині прошли упамятніня жертв войны з початку 90. років. Головны торжества зачали ся перед полудньом в Центрі Памяти Поточарі на місци масовых гробів жытелів Сребрениці. Участ в них брали: Бакір Ізетбеґович, член Президиі Босніі і Герцеґовины, амбасадор Хорватской Республикы в Босніі і офіцийны делеґациі вшыткых бывшых югославяньскых республик. Бракло лем сербского державного представительства.
Присутны были депутуваны до сербского парляменту, репрезентуючы мусулманьску меншыну. Од Русинів была і посланка Олена Папуґа з Ліґы Социяльдемократів Войводины. Пришла она довєдна з предсідательом свойой партиі – Ненадом Чанаком.
Центер Памяти Поточарі

Центр Памяти Поточарі, 11 липця 2017 р.

Бакір Ізетбеґович закликал сербскій уряд, жебы тот перестал перечыти ґеноцидови, якого допустили ся в Сребреници ведучы армійом босняцкых Сербів.

Ґенеральний Секретар ОЗН Антоніу Ґутерреш перед річницьом ґеноциду в Сребреници закликал вшыткых, жебы честно зазріти в минуле і доложыти стараня, як повіл, жебы подібны злочыны николи ся не повторили. Медженародна соспільніст і ОЗН приняли на себе частину одповідальности за траґедию, котра притрафила ся в Сребреници, і тяжко працували, жебы лекция не была даремна і николи не принесла подібных неуспіхів – повіл Ґутерреш.

Через три рокы, од 1992 р., специяльным посланцьом ґенерального секретаря ОЗН од людскых прав в бывшій Югославіі был бывший польскій премєр Тадеуш Мазовєцкій. Документувал він за тот час порушаня права і воєнны подіі, прібувал єднати і помагати жертвам войны. По масакрі в Сребреници, як протест против безсильности войска ОЗН, резиґнувал.
11. липця/юлия 1995 р. Сребреницю заняла армія босняцкых Сербів під проводом ґенерала Ратко Младича. Пак вбили веце як 8 тисячів мусульманьскых хлопців і мужчын, а більше як 40 тис. жытелів міста было прогнаных. Дальшы соткы жертв были серед біженців. Вшыткы траґічны подіі проходили лем на пару місяців перед кінцьом зачатой в 1992 р. войны в Босніі і Герцеґовині.

Поточарі

фото горі – посланка Олена Папуґа складат квітя при памятнику жертв Сребрениці

Вісти

Про автора

Богдан Ґамбаль
Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментар