Голосник

Уж по матурі з лемківского языка

0

Як писали сме на портали lem.fm, днес, 23. мая 2018 рока, в Польщы проходила матура з лемківского языка. То єден з предметів, котры абітуриєнты могли выбрати посеред інчых до узысканя свідоцтва дозрлілости. Тогорічны матуры в середніх школах зачали ся 4. мая 2018 р. Наконец, матуристы приступили до еґзамінів з чужых языків та языків нацийональных меншын. Минула середа прошла з іспытом з лемківского языка.

Як чытаме з медияльных інформаций, до тогорічной матуры з лемківского языка зголосило ся двох учеників середніх шкіл, але лем єден конечно ґу ній приступил. То Данько Стариньскій з ІІ Загальноосвітнього Ліцею в Ліґници, котрий спосеред заданых тем выбрал інтерпретацию тексту Нестора Репелы. Його учытельом од початку освіты єст Лука Возняк, долголітній педаґоґ і выхователь вельох учеників, приступуючых до матуры з лемківского языка.

Перша матура з лемківского языка была писана в 2013 р. Першым учеником был Данько Возняк з ІІ Загальноосвітнього Ліцею в Ліґници. О рік было уж двох матуристів, єден зас в Ліґници, а другій в Ґорлицях. Од пятьох років, рік в рік находят ся охочы здавати матуру в рідным лемківскым языку. Тішыт тото, же каждий наступний рік находят ся особы, котры – хоц не все мают замірене іти в будучым по гуманістичній леніі – прібуют приступувати до еґзамінів з лемківского языка.

Шеруй.

О авторі

Демко Трохановскій

Актуальні ховат дві дівкы, а медже, по і попри тым - шефредактор інтернетового порталю lem.fm. Любитель языків. Вшыткых языків.

Коментар