Од 4. мая 2018 р. в середніх школах в Польщы проходят матуральны еґзаміны. Абітуриєнты з головныма шкільныма предметами змагали ся на початку місяця. Тепер ідут матуры з поєдных чужых языків та языків нацийональных меншын. В найблизшу середу, 23. мая, пройде матура з лемківского языка.
Тогорічний іспыт з лемківского языка зачне ся о 9.00 год. Матуру з лемківского мож здавати лем в розшыреным вымірі. То кус інакше як при першых матурах з лемківского (2013, 2014, 2015 рр.), коли мож было здавати і на основным рівни.
В середу матуранты будут мати 180 минут, жебы написати долшу працу (не меньше як 300 слів) на єдну з двох поданых тем. До той поры єдна з них тыкала поезиі, а друга прозы. Вчас писаня працы, подібні як на інчых еґзамінах з меншыновых языків, ученик може спомагати ся польско-лемківскым і лемківско-польскым словником.
Перша матура з лемківского языка была написана в 2013 р. Першым одважным был Данько Возняк з ІІ Загальноосвітнього Ліцею в Ліґници. Рік пізнійше было уж двох матуристів, єден зас в Ліґници, а другій в Ґорлицях. Од пятьох років, рік в рік находят ся охочы здавати матуру в рідным лемківскым языку. Не інакше є і того рока.
Коментарі