Голосник

В Ґладышові спрібуют побити Рекорд Польщы

0
Фунґуюча в Ґладышові, Лемківска Едукацийна Загорода 18. вересня/септембра 2018 р. выстартує в офіцийній пробі встановліня традицийного Рекорду Польщы на найдолше повересло з сіна. Рекорд буде битий в рамках підсумуваня проєкту «Жытя на селі 100 років тому», якій орґанізуваний є Фундацийом Лемківска Загорода.

Проба встановліня рекорду зачне ся о 11.00 год. на обшыри ЛЕЗ в Ґладышові. Проєкт зголошений є до Бюра Рекордів. Кєд бы участникам повело ся го побити, буде він офіцийно вычыслений на листі Рекордів Польщы.

Як інформуют орґанізаотры, цілю акциі єст інтеґрация молодежы, котра бере участ в проєкті, будуваня активных меджепоколіньовых реляций та охорона культуровой спадковины Лемковины через хоснуваня традициі в забаві. Окрем творіня найдолшого повересла, на участників акциі жде вельо товаришучых атракций. Вчас подіі, окрем звиджаня Лемківской Едукацийной Загороды, буде мож видіти выставту стародавных чачок і прібувати потягнути трактор на повереслі.

Биючы Рекорд Польщы на найдолше повересло зо сіна, причыняме ся до охороны культуровой дідовизны Лемковины. Тримаме пальці за успішне проведіня цілой акциі, можеме чытати на сайті Бюра Рекордів.

Лемківска Едукацийна Загорода знана є тіж як Дзюбинівка – од назвыска родины Дзюбинів, якы од парох років ю ведут. Великом атракцийом для одвиджаючых Низкій Бескід являт ся старий одреставруваний комплекс лемківской забудовы. Складат ся він з хыжы, двох сыпанців, вітровых млинів, студні з журавльом та кєрату. В середнині обєктів находят ся ориґінальны, памятковы нарядя і ґратя, якы сут не лем выставляны, але і хоснуваны вчас варштатів. В ЛЕЗ Стоваришыня «Руска Бурса» з Ґорлиц орґанізувала молодіжны таборы, на якых лемківскы діти і молодіж познавали жытя на давній лемківскій ґаздівці.

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар