Голосник

В Михалові припомнут Руску Народну Республику Лемків

0
В найблизшу неділю, 23. грудня/децембра 2018 р. в Михалові, в нижньошлезскым воєвідстві, жытелі села припомянут собі 100. річницю фльориньского віче і дальшы подіі з 1918-1921 рр., якы в істориі записали ся під темом Руской Народной Республикы Лемків.

Подія пройде в хыжы при церкви св. Михала Архангеля, котра приналежыт до місцевой православной парохіі, яка вєдно з Кружком Стоваришыня Лемків в Михалові орґанізує сесу подію.

Вчас подіі прелекцию про Лемківску Республику і політичны стремліня Лемків выголосит Ярослав Горощак, знаний тіж під пседвонімом Ярослав Гунька, якій в лемківскым середовиску найбільше записал ся через выданя першого лемківско-польского і польско-лемківского словника. В рамках проґраму має быти промітаний і архівальний фільм з посвячыня михалівской церкви, якa была побудувана в 1987-1989 рр. будучы першом церквом в західньо-лемківскым стилю на західніх землях Польщы, а высвячена 6. серпня/авґуста 1989 р.

Посліднім пунктом проґраму буде презентация фотоґрафій з рідной Фльоринкы, як і знимок представляючых жытя Лемків на чужыні. В наслідстві акциі Вісла до Михалова трафили 33 родины з Фльоринкы, ґрибіского повіту.

Подія пройде внет по Божескій Літургіі, яка зачне ся о 9.00 год.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар