Голосник

Варголь за віртуальну валюту

0
Віртуальны валюты хоснуваны сут уж не лем до зарабляня, а тіж до інвестуваня, нп. в творы штукы. Єдна лондоньска ґалерия, котра належыт до ґрузиньской аристократкы – Елісы Дадіані, рішыла продати участ в серіґрафіці Енді Варголя за біткойны.

На аукцию выставленых є 49% участи в роботі «Малы електричны кресла» з 1980 р. Ґалерия Dadiani Fine Art в Мейфер продаж ріжных люксусовых продуктів зачала влони. Окрем творів знаных артистів, аукцийний дім оферує до придбаня за віртуальну валюту м.ін. нестрічане дорогоцінне каміня ай цінены маркы старых авт.

Аукция, на котрій буде мож придбати «Малы електричны кресла», заплянувана є на 20. червця/юнія т.р. Як выявила властистелька ґалериі, є она переконана, же Варгольовий твір осягне барз высоку ціну, дотля нестрічану в обшыри віртуальных валют і плачыня за творы штукы біткойнами. Е. Дадіані має самособом надію, же продаж образу даст велику зміну в свідомости, фінансах та культурі.

Технолоґія віртуальных валют то обшыр фурт ся розвиваюча. Знавці темы сут пересвідчены, што коли речений твір буде проданий, за ним отворит ся поле на дальшы аукциі в біткойнах і другых віртуальных пінязях. Посліднім часом ґалерия Dadiani Fine Art в Мейфер продала за літкойны (валюту конкуруючу з біткойном) пару авт Формулы 1 до Кытаю.

«Малы електричны кресла» выцінены сут на 4,2 мілийона фунтів, котры будут проданы в одповідній участи і в перерахуваню на віртуальны біткойны.

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар