Голосник

Влада схвалила грошы про музей Варгола, Калинів і окрес Снина

В середу 23-го октобра 2019-го року проходило далше выїздове засіданя влады Словацькой републікы, тот раз в Кежмарку. Як інформовала аґентура TASR, владный кабінет знова роздільовав грошы.

В Кежмарку ся вырішыло і о тім, же фінанчны средства дістануть ся і до русиньского реґіону. Влада схвалила грошы про окрес Снина, про музей Варгола в Меджілабірцях і про село Калинів на докінчіня обновы памятника Освободжіня.

Окрес Снина буде рішыти воду на питя

Хоць в окресі Снина находить ся водный резервоар Старина, котрый быв выбудованый на теріторії, де колись были русиньскы села, якраз тот окрес має проблему з водов на питя. Жебы рішыти сітуацію, влада схвалила Пряшівскому самосправному краю пожычку єден міліон евр.

Схвалена сума має служыти на выпрацованя проєктовой документації про выбудованя енвіроменталной інфраштруктуры в окресі.

Пряшівскый самосправный край має в окресі Снина цілково 34 сел, з того лем шість діспонує зліпшеныма службами додаваня воды на питя і каналізації. „Добудованьом основной інфраштуктуры бы ся в окресі підпорив і турістічный рух“, пише ся в матеріалі влады.

Край вже в місяці май підписав змлуву на выпрацованя штудії реалізації проєкту. Тота штудія є фінанцована з дотації в сумі 130 тісяч евр і єдночасно з розрахунку краю в сумі 16 тісяч евр. Моментално ся на штудії робить. Посуджованы в ній будуть децентралізованы рішіня додавок воды штирьох зґруповань сел в окресі Снина зо жрідел, котры бы представльовали алтернатіву ку резервоару Старина.

Выбудованя енвіроманталной інфраштруктуры буде плачене з еврофондів. Но край потребує достаток фінанцій на час меджі заплачіньом проєктовой документації і здобытьом средств од сел з чуджіх жрідел. Зато потребує поміч од державы, котра была днесь схвалена.

Варгол дістане понад 7 міліонів

В Кежмарку ся дефінітівно схвалили і грошы про Музей модерного уменя Енді Варгола в Меджілабірцях. 7,1 міліон евр є сума, за котру ся Варголів музей перебудує. У владнім матеріалі было підкреслено, же є то єдиный музей Варгола в Европі і єден з двох існуючіх на світі.

Схвалены фінанчны средства дають музею сучасный дізайн і функціоналіту, котры зодповідають 21-му столітю. Веце о планованій реконштрукції мож дочітати ся ту.

В музею будуть новы оддыховы і інтерактівны зоны, літній амфітеатер на стрісі будовы, але і ательєры. Перебудованя забезпачіть до будучности можливости орґанізованя різный подіх, будуть годны робити ся і презентації уменя в екстерьєрі на терасі, котра буде на стрісі, на фасаді будовы, а і на новім намістю перед будовов.

Фінанції ся будуть давати поступно. Першы два міліоны прийдуть до 31-го януара 2020-го року, до 31-го януара 2021-го року бы музей мав дістати далшы штири міліоны, решта – 1,1 міліона евр, бы мала прийти до 31-го януара 2022-го року.

Грошы і до Калинова

І першому освободженому селу в бывшій Чехословакії днесь влада схвалила грошы. На ревіталізацію публічного простору коло памятника Освободжіня дістав Калинів, в окресі Меджілабірці, 50 тісяч евр.

За тоты грошы має оправити ся драга ку Дому смутку, котра веде коло памятника, так само бы мало новый асфалт дістати намістя перед памятником, докінчіти бы ся мали і теренны оправы. Уж теперь реалізує ся обнова памятника і його околіці, на што влада дала 60 тісяч евр іщі в місяці апріль. За тоты грошы были зреалізованы роботы на санації і одводніню памятника.

Жрідло фотоґрафії: Mesto Kežmarok.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі