Голосник

Вынятково Шымбарк просит на великодній ярмак

0

Як каждий рік, вєдно з приходом яри, Мазярска Загорода в Лоси, яка є одділіньом ґорлицкого Музею Дворы Карвациянів і Ґладышів, просит на Лемківско-Погіряньскій Великодній Ярмак. Явил ся уж детальний проґрам тогорічной едициі подіі.

Ярмак пройде в неділю, 18. марця 2018 р., вынятково не в Лоси, а в Шымбарку, в тамтышнім Скансені Погіряньского Села ім. проф. Р. Райнфуса. Єдноразова зміна локалізациі подіі спричынена є тогорічныма будовляныма роботами в загороді в Лоси.

Подія значне ся о год. 11.30 одкрытьом цілодньового кєрмешу ремесел. Передвиджено і акциі про діти і дорослых. О 13.00 год. наймолодшы будут мати нагоду взяти участ в турнірі битя яєц та дальшых великодніх забавах. Піл годины пізнійше пройде выкликуюча вельо добрых емоций акция полюваня на яйця – треба найти аж 800 вкрытых яєц. Переможцьом є тот, хто збере найбільше чысло в окрисленым часі.

На кєрмешы буде мож придбати розмаіты святочны прикраскы ручной роботы, готовы крашанкы, домашні выробы реґіональной кухні і ін. В рамках варштатів буде мож спрібувати зробити погіряньскы пальмы ци заняти ся крашыньом яєй подля типовой для Лемків технікы.

Заінтересуваны выставити свій крам на тогорічным Лемківско-Погіряньскым Великоднім Ярмаку в Шымбрарку фурт можут ся іщы зголосити. Більше за контактом на афішы.

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар