Выставка о Масарікови ку сторічніці у Свіднику

0

28-го октобра 2018-го року собі Чеська і Словацька републіка припомянуть сторічніцю выникнутя Чехословацькой републікы, сполочной державы Чехів, Словаків і Русинів. В повязаню з тов річніцьов орґанізують ся в тых двох державах різны події. Єдна теперь приготовлює ся і у Свіднику.

Выникнутя републікы з радостьов привітали і жытелі Свідника і його околіці. Свідничане із нагоды 10-го юбілею выникнутя Чехословакії збудовали у втогдышнім Вышнім Свіднику памятник, котрый находив ся на тогрогвиску – пляці. Святочно быв одкрытый 28-го октобра 1928-го року. На тій подій брала участь велика кількость людей. Теперь на тоту історічну дату, коли на мапі світа появила ся Чехословакія, будуть Свідничане споминати фотоґрафічнов выставков, котру приготовлює Піддукляньска бібліотека у Свіднику.

Бібліотека в місяці май 2018-го р. святочно одкрыє унікатну выставку під назвов Т. Ґ. Масарік у фотоґрафії. Експозіція презентує особность Масаріка – основателя державы і першого презідента, його родину і сполоченьско-політічны дії в його жывоті. Выставка уж была представлена у Варшаві, Братіславі, Бруселі, Берліні, Ґісені і у Відню. Окрім панелів із добовыма фотоґрафіями навщівници будуть годны видіти Масаріків білый їздецькый анцуґ, вырізаваный крестик ці керамічну качку з його стола, а не будуть браковати ани копії його списів.

Як інформовав редакцію Каміл Бенько, директор Піддукляньской бібліотекы у Свіднику, выставку бібліотеці пожычів Музей Т. Ґ. М. Раковнік з Чеськой репубкікы. О точній даті одкрытя експозіції буде бібліотека іщі інформовати.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2018. Вшыткы права застережены.