Голосник

XIII едиция Стріч Трьох Поколінь з Лемківском Культуром в Пшемкові

В суботу, 16. листопада/новембра 2019 р., Кружок Стоваришыня Лемків орґанізує в Пшемкові на Нижнім Шлеску XIII Стрічы Трьох Поколінь з Лемківском Культуром. Подія зачне ся од 16.00 год. в Пшемківскым Домі Культруы.

Тота шторічна подія направлена на вшыткы поколіня Лемків. До тых, што іщы мали нагоду народити ся на рідній Лемковині, до діти выганців, і до наймолодшых, т.є. внуків тых, котры днеска передают своім потомным автентичный лемківскій язык, культуру, звыкы і знаня про лемківску/русиньску історию.

Як і в попередніх роках, так і тым разом лемківска громада з Пшемкова, котра асоциює ся при тамтышнім кружку Стоваришыня Лемків, зрыхтувала цікавый артистичный проґрам. Окрем ґаздів – Лемківского Ансамблю Пісні і Танця «Ластівочка» і надійной для каждого, в тым і нашого Народу, т.є дітячой ґрупы «Ластівчата», на пшемківскій сцені выступлят іщы «Троянда» і добрі нам знана «Кычера» з Ліґниці. До Лемків в гости завитат тіж бойківскій Ансамбль з Мокрого «Ославяне».

Орґанізаторы надіют ся, што на стрічу придут вшыткы Лемкы і Лемкыні не лем з Пшемкова, а тіж і вельо інчых запрошеных і заприязненых гости, котры репрезентуют світску, державну і локальну владу, як тіж духовы представникы православной і грекокатолицкой Церкви.

Приємно нам поінформувати, же радийо ЛЕМ.фм являт ся медияльным патроном XIII Стріч Трьох Поколінь, што значыт, же будме гын і напевно принесеме Вам радийову реляцию.

Шеруй.

О авторі

Мирко Воргач

Хоц то моі реляциі нагрываны сут на Заході, то слуxай мя в радию Руской Бурсы на частотах: 106.6 МГз в Ґорлицяx, 103.8 МГз в Польковицяx i в цілым світі онляйн на www.lem.fm   ;    Контакт: mirek@lem.fm

Коментарі