1000. річниця смерти св. Владиміра Великого буде празднувана в Креници
Постановом Св. Собору Єпископів Польской Автокефальной Православной Церкви з 17. марця 2015 р., рішено, же 1000. річниця дня смерти св. Владиміра Великого буде празднувана на Лемковині, в місті Крениця, де находит ся храм, котрого єст покровительом. Дотепер знаме лем тілько, кілько остало написане в заяві Св. Собору Єпископів ПАПЦ. Як лем явит ся більше інформаций – принесеме іх на порталь.
Парафія св. Владиміра Великого в Креници была ериґувана декретом митрополиты Василия 1. червця 1981 р. Церков остала воснесена в роках 1983-1996, посвячена 8. вересня 1996 р. в чест св. Владиміра, Крестителя Руси. Храм свойом архітектуром, хоц модерном, має навязувати до тридільных лемківскых церкви. Плянувана єст розбудова вежы – дзвінниці, на котрій буде поставлена найвысша баня. Першым парохом в Креници был о. митрат Василь Ґалчык (спілпрацовник радия лем.фм, автор проґраму “Церковна гомілетыка”), а од 2006 р. креницкых православных вірных веде о. прот. Петро Пупчык. Од моменту основаня парафіі дяком і дириґентом церковного хору єст Петро Трохановскій.
Креницка парафія єст єдном з невельох в Польщы, в якій декотры фраґменты Службы Божой (св. Євангелия і Апостол) чытаны сут в лемківскым языку. В церкви находит ся таблиця, написана в лемківскым языку, інформуюча о вознесіню храму в роках 1983-1996.
Запрашаме до обізріня інтернетового сайту креницкой православной парафіі св. Рівноапостольного Князя Владиміра – за тым мотузком та до выслуханя, найденого в сервісі YouTube, награня части вечернього Богослужыня Великого Четверга.
