Голосник

15 років од першого засіданя СКУтНіЕМ

15 років тому своє перше засіданя одбыла Спільна Комісия Уряду та Нацийональных і Етнічных Меншын Польской Республикы.

Інавґурацийне засіданя прошло 21. вересня/септембра 2005 р. в Варшаві. Товдышній Міністер Внутрішніх Справ і Адміністрациі Ришард Каліш вручыл членам Комісиі номінацийны акты.

Номінациі членів

Серед покликаных членів СКУтНіЕМ два місця были призначены для лемківской етнічной меншыны. Членами остали др габ. Олена Дуць-Файфер, выбрана лемківскыма орґанізациями, і Штефан Гладик, котрый был призначеный міністром без поясніня причыны покликаня таком же дорогом – при протестах лемківскых орґанізаций, якій од початку репрезентувал проукраіньскє становиско.

З доступного справопису з історичного І засіданя выникат, што Дуць-Файфер выразила спротив односно покликаня на члена Комісиі ведучого Обєднаня Лемків, Штефана Гладика. Дальше в документі стоіт, што пізнійше репрезентантка лемківской меншыны представила вшыткым членам Комісиі становиско в тій справі части лемківскых орґанізаций.

В 2014 р. за Штефана Гладика был покликаный др габ. Штефан Дудра, а о пару місяців в місце др габ. О. Дуць-Файфер была призначена др Мирослава Копыстяньска. Процедура одкликуваня і покликуваня членів была неясна і арбітральна. Хоц головны лемківскы орґанізациі зголошали свій спротив односно одкликаня Дуць-Файфер, не были они респектуваны через уряд.

Вчас першого засіданя СКУтНіЕМ бесідувано про реґулямін комісиі, а тіж проведено дискусию на тему высокости і принципів признаваня ґрантів в 2006 р. на розвиток і спераня діяльности поєдных нацийональных і етнічных меншын. На засіданю выбрано першых спілведучых Комісиі. За урядову страну остал ним Ян Шен, підсекретар стану в МВСіА, а за меншынову страну выбраный был Мирон Кертичак, ведучый Обєднаня Украінців в Польщы.

СКУтНіЕМ

Спільна Комісия Уряду та Нацийональных і Етнічных Меншын была покликана в 2005 р. як наслідство записів Уставы про нацийональны і етнічны меншыны та про реґіональный язык з 6. січня/януара 2005 р.

Задачом СКУтНіЕМ єст выдавати опініі і радити в справах тыкаючых ся меншын. Творят єй представникы выміненых в уставі міністерств та представникы нацийональных і етнічных меншын. Право засідати в Комісиі має 13 нацийональных і етнічных меншын та ґрупа бесідуюча реґіональным языком (Кашебы). З першого складу СКУтНіЕМ дотля засідат в ней 6 осіб.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі