20 років з традицийном музиком: ювілейный концерт хорів «Зоря» і «Роса»

Уж о тыжден жытелі Устя Руского і околиц будут мати нагоду быти участниками незвыклой подіі – ювілейного концерту хорів «Зоря» і «Роса», якы будут празднувати 20-літя свойой діяльности. Оба ансамблі, діючы при Ґмінным Осередку Культуры в Устю Рускым, од років плекают музичну спадковину реґіону, презентуют традицийны лемківскы, украіньскы і погіряньскы співанкы.

Концерт одбуде ся в суботу 28. вересня/септембра 2024 р. о 16.00 год. в авли Комплексу Шкіл в Устю Рускым. Орґанізаторы заповідают дуже забавы. Специяльным гостьом буде ґрупа Бурян, котра прикрасит музичне видовиско своіма сердечныма выконанями лемківскых співанок.

Вынятковым елементом ювілейного концерту буде премєра музичной платні під наголовком «Повороты». Альбум то свого рода підсумуваня послідніх років артистичной діяльности хору «Зоря», находят ся на ним пісні, котры роками были основом репертуару хору. Буде то уж друга в доробку колективу платня. Перша, пн. «Не лем на небі», была печатана в 2007 році. На найновшым кружку «Зорі» находят ся народны, але і авторскы творы, в опрацуванях: Анны Дубец, Анны Дильонґ, Тадеуша Хахая, Рафала Фудалі і Павла Малецкого.

Хор «Зоря» то штыріголосовый мішаный хор, од 2004 рока веденый через Анну Дильонґ. Хор специялизує ся з выконанях a capella. Репертуар обнимат традицийны народны творы Лемків, але тіж коляды і церковну музику. «Од самого початку нашым цільом было плеканя співочых традиций, котры сут частю достоменности Лемків. Спів то для нас форма бесідуваня о минулости, а заєдно спосіб на підтриманя той жывой культуры» – підкрислят Анна Дильонґ, дириґентка хору.

Через двадцет років діяльности «Зоря» здобыла узнаня в реґіоні і шырше – выступувала в ріжных містах Польщы і на Словациі. Што рока выступує на Лемківскій Ватрі на Чужыні в Михалові на Нижнім Шлеску і привозит естрадового духа гір на низинну обшыр заходу. Ґрупа выступувала м.ін. на Медженародных Бієнале в Креници, Фестівали Лемківской Культуры в Ґожові, Фестівали Ватра в Ждыни ци на Королівскым Замку в Варшаві. Реґулярні выступує на локальных подіях. «Каждый концерт єст для важный, бо то можливіст ділити ся нашом пасийом співаня і нашом спадковином. Тішыме ся, же музика Лемків і Погірян, котра была передавана з поколіня на поколіня, дале жыє і потрафит зворушати люди» – додає дириґентка.

Хор «Роса» то молодша формация, котра для молодежы з ґміны Устя Рускє єст шансом на розвиваня музичных талантів. «Роса то місце, в котрым молоды люде можут не лем розвивати своі вокальны можливости, але тіж вчыти ся працы в ґрупі і одповідальности. Хочеме, жебы тоты занятя не лем вводили в світ музикы, але тіж формували молодых люди» – пояснят Анна Дильонґ. Хор, подібні як «Зоря», співат головні музику Лемків і Погірян, а його члены часто, по выступуваню і набераню практикы і освоіня зо сценом з «Росом», продолжают свою пригоду зо співом в наступных ансамблях.

«Зоря» і «Роса» сут інтеґральном частю вельох локальных і позареґіональных культурных подій. Ювілейный концерт буде для обидвох ґруп нагодом до святкуваня успіхів і підсумуваня іх двадцетлітньой діяльности. «То для нас особливый момент. Через тоты рокы мали сме нагоду спілпрацувати з вельома вынятковыма людми і ділити ся нашом любовю до співаня з шыроком публиком. Тішыме ся, што вчас того ювілею можеме разом святкувати з нашыма приятелями, родинами і симпатиками» – бесідує дириґентка.

Награня і ювілейный концерт реализуваны сут завдякы фінансовій підпорі Малопольского Воєвідства. «Вшыткых любителів традицийной музикы – сердечні запрашаме!».

Фот. Архів хору «Зоря»