200.000 одкрыть порталю ЛЕМ.ФМ в 2015 р. ДЯКУЄМЕ!

З великом радістю інформуєме, же недільний вечер, 11. жолтня/октобра 2015 р. – подля статистык Google Analytics з 22.00 год. за карпаторусиньскым часом (в американьскым Ню Йорку была товды 4.00 PM, а в австралийскым Сидней – 7.00 АМ) – принюс нам чудову віст. Порталь лем.фм был одкрытий ВАМИ понад 200.000 разів в 2015 р. Двіста тисячів то чысло, до котрого нам бракло парусот одкрыть в цілым 2014 р., што вказує, же нас любите і чытате іщы барже охочо і часто як влони, але тот результат приємні заскочыл і нас…

Хочеме Вам барз ПОДЯКУВАТИ і єдно обіцяти – мы з Вами фурт, ден і ніч, яр, літо, осін і зиму, зато кєд Ваша присутніст на портали, котрий зо статі на статю єст іщы барже мультімедияльний і мультіфункцийональний, буде ся так динамічні збільшала, мы выдолжыме ден понад 24 годины, а з рока выдусиме більше як 365 такых днів.

Радийо і порталь лем.фм то дві части єдного тіла, мож бы речы – дві рукы перпетуум мобіле, махаючого штораз шырше і дальше, за каждым махом приносячы в жменях штораз більше інформаций о тым, што ся діє посеред Русинів цілого світа. Не знаме границ, не ставляме сой самоограничынь, не боіме ся звідувати, а віры не зломит нам біда – так нам підповіл робити іщы парудестят років тому наш Учытель-Русенко. Тым більше ся тішыме, же тото, што робиме, так Вам ся любит!

Проєкт ЛЕМ.ФМ не розвивал бы ся так шумні без фінансового спертя Міністра Адміністрациі і Цифризациі, котрий в рамках дотациі на охорону, підтриманя і розвиток культуровой достоменности лемківской етнічной меншыны, допомагат в фунґуваню радия і порталю в такым виді од 2011 рока. ДЯКУЄМЕ!

Од імени цілого ансамблю ЛЕМ.ФМ –

Демко Трохановскій – шефредактор