50 років скінчыл др Богдан Горбаль – на многы і благы літа!

Мусиме ся признати, же о єдній – не дост, же округлій, та барз важній – річници сме забыли… В минулым тыжни ювілей 50-літя святкувал др Богдан Горбаль – русиньскій патріота, выдатний дослідник, автор вельох науковых і популярных статій, дописів і книжок, будучий близко при лемківскых справах уж од 80. років ХХ столітя.

Богдан Горбаль вродил ся 27. жолтня/октобра 1965 рока в Сьцінаві над Одром на Нижнім Шлеску, а його родиче были выселены в рамках Акциі «Вісла» з Бортного і Мушынкы. По скінчыню історычных студий, оборонил докторат на Вроцлавскым Університеті, потім іщы – бібліотекознавчы студиі в нюйоркскым Квінс Коледж в ЗША.

Іщы за студентскых часів, в 80. роках ХХ ст., Богдан Горбаль зачал публикувати своі лемкознавчы дописы. В «Голосі Ватры», єднодньовій ґазеті, выдаваній з нагоды лемківскых – іщы товды – ватр, в 1988 році опубликувал допис про Руску Народну Республику Лемків і была то єдна з першых, по вельох роках поминяня через науковців, статій, припоминаюча о державотворчых стремлінях Русинів пілнічного боку Карпат періоду по Великій Войні. Своі заінтересуваня том темом обнял в маґістерскій роботі, а пошырил іх в найполнійшым доднес опрацуваню, тыкаючым Руской Народной Республикы Лемків, выдаючы книжку Działalność Polityczna Łemków na Łemkowszczyznie 1918-1921, котра ся вказала в 1997 році.

В часах, коли Лемкы были выняты комуністами спід права, публикувал статі в підземных антикомуністычных выдавництвах. Діял в антикомуністычным «NZS» (Незалежне Здружыня Студентів) в Вроцлаві, был при першых – лемківскых іщы – Ватрах, котры горіли на Лемковині в рр. 1983-1989, а по політычных перемінах 1989 рока, дальше актывні реалізувал лемківскы стремліня, котры мали на ціли одродити русиньскій дух в народі. Од основаня сучасных лемківскых періодычных выдань, реґулярні публикує історычны статі в «Бесіді», «Лемківскым Календари», «Лемківскым Річнику» та «Річнику Руской Бурсы». Єст редактором лемківской части «Енциклопедиі Істориі і Культуры Карпатскых Русинів».

Богдан Горбаль то автор чысленных науковых дописів, котры фурт публикує по анґлицкы, польскы і, предовшыткым, в лемківскым языку. То завдякы його досліджыням знаме склад членів уряду і цілу історию Руской Народной Республикы Лемків, завдякы ньому дознаєме ся, же Украіньска Повстанча Армія на свідомых русиньскых териториях Лемковины такой нияк на мала прихыльників посеред Лемків, а напевно не тілько, як представлят тоты подіі украіньска ідеолоґічна пропаґанда. То лем вершок ледовой горы статій дра Богдана Горбаля, понеже полна листа його публикаций тепер єст уж рахувана в сотках.

Пане Богдане, приймийте од нас, хоц спізнены, та щыры желаня вшыткого доброго – НА МНОГЫ І БЛАГЫ ЛІТА!