«70%» – З Жеґєстова до Галича – ч. 2 – неділя, 18.00 год.

Днескы зас бесідуєме о родині Собчышаків з Жеґєстова. Пришли сме до пані Стефы Крук (з Собчышаків), яка мешкат в Галичы. Коло ней видите велику весільну фотоґрафію з єй шлюбу. Коли пані Стефа оповідала о молодости, легко мі было представити сой, як выглядала, бо смотріла єм на тоту знимку.

Єст гев і інча фотоґрафія з ньом, зроблена кус веце як пятнадцет років тому, і тота знимка для ґаздыні тіж барз дорога. Она стоіт пред памятником в Галичы, автором якого єст єй сын. По одкрытю памятника праві вшыткы фотоґрафували ся гын – певно што каждому сподабала ся тота ідея і єй реализация. Розтятый камін, роздвоєна скала, капличка – невеличка посередині, яка гейбы утримує тиск, розпір, силу каменів… Певно, так выглядат і доля Лемків…