85. річниця народжыня Ярослава Поляньского

Днес, 15. серпня, минят 85 років од народжыня выдатного етноґрафа, дириґента, композитора і аніматора культуры – Ярослава Поляньского.

Ярослав Поляньскій вродил ся 15. серпня 1930 р. в лемківскым селі Поляны к. Крениці (західня Лемковина). В 1947 р., як більшіст Русинів, котры остали ся на Лемковині, враз з родичами выселений был на західні землі Польщы в рамках Акциі «Вісла».

По скінчыню в 1954 р. педаґоґічного ліцею і музычной школы, од 1956 р. вчыт музыкы в школах Зеленогірщыны і уж товды записує од Лемків вельо пісен та веде першы лемківскы хоры. Пак зачынат науку в Музычній Академіі ім. Ф. Шопена в Варшаві, котру кінчыт в 1964 р. маґістерском дисертацийом пн. Характеристыка лемківской пісні.

Жытя Ярослава Поляньского припало на трудний для Лемків період, коли то культуральна діяльніст могла проходити лем під контрольом украіньскых орґанізаций, акцептуваных товды комуністычныма властями, зато більшіст його професийональной музычной карєры одбыват ся через ведіня украіньскых хорів, але і до іх репертуару вводит вельо русиньскых пісен, котрых в своім жытю обробил і записал (враз з вариянтами) ок. 5000.

Найбільшы успіхы як дириґент здобывал з основаным в 1972 р. мужскым хором «Журавлі», котрий діял під крылами Украіньского Соспільно-Культурального Товариства, але по 11 роках ведіня і вынесіню на найвысший музычний рівен, в неприємных обставинах зо стороны верхушкы, перестал ним дириґувати. Потім вюл іщы церковны та інчы хоры.

Ярослав Поляньскій был вельократні нагороджуваний ріжныма преміями, м.ін. в 1966 р. Міністерством Культуры, котре признало му званя «Заслужений діяч культуры».

Вмер 15. марця 1994 р. в Отвоцку к. Варшавы і там єст похований.