Мышпергачы і церков в Ріпнику

Присутніст мышпергачів на поді церкви св. Параскєвы в Ріпнику є шансом на єй скору модернізацию. Подібні як в примірі інчых церкви на Лемковині, окремы інституці, якы дбают на охорону тых звірят, при нагоді помагают в ремонтах старых сакральных обєктів.

При помочы середків, котры признаны были на ріпницку церков, буде змодернізуваный предовшыткым дах святыні, на чым скорыстают і люде, і мышпергачы.

Охорона з модернізацийом

Інвестицю, котра має за задачу сохранити три рідкы виды мышпегачів, буде реалізувала Реґіональна Дирекция Охороны Середовиска в Ряшові. При нагоді буде ведена і ревіталізация грекокатолицкой церкви св. Параскєвы, а то в такым вымірі, жебы сотворити звірятам обставины до зрастаня іх популяциі.

Роботы будут обнимати ремонт конструкциі даху (головной бані) і выміну знищеных деревяных части. Пак, буде положена нова титаново-цинкова бляха. Будут ведены і направы тых елементів, котры переходили головну модеренізацию скорше, так жебы пристосувати іх до теперішніх вымогів. Замонтуваны будут напр. громоодводы.

Про мышпергачів буде проведена адаптация на поді церкви. Побудуваны будут специяльны плятформы, на котрых будут мочы они сідити, та місця, через котры звірята вылітуют і влітуют назад на церковный під.

Фіналізацию робіт заплянувано на конец марця будучого рока. З подібных проєктів скорыстали м.ін. церки в Креници ци Ізбах, але і інчы на Лемковині, котры завдякы присутности мышпергачів могли провести своі основны ремонты.

Лемківска церков

Ріпник то єдно зо сел, котре находит ся на Коросняній Руси. Церков св. Параскєвы была побудувана в 1912 р. То муруваный храм, котрый представлят стиль дотля рідко стрічаный на Лемковині. При ній стоіт о вельо старша деревяна дзвінниця з дзвоном датуваным на 1601 р. По выселіню Русинів (в більшости до Росиі) храм был переданый римокатоликам. Од 1990 р. є вписаный до реґістру памяток.

В 1935-1936 рр. коротко парохом церкви был о. Євгеній Усцкій, котрый підпорювал в меджевоєнным періоді Руску Бурсу в Ґорлицях. В родині предідучого місцевого пароха вродил ся Модест Гумецкій, бургомайстер Коросна, поета і соспільный діяч.

фот. Вікіпедия