Реконштрукція Варголового музея штораз реалніша. Жупа дістала далшы грошы

Пряшівскый самосправный край має на своїм банковім конті другу часть державной дотації на велику обнову і модернізацію Музея модерного уменя Енді Варгола в Меджілабірцях в сумі штрири міліоны евр. Інформовала о тім аґентура SITA.

Пряшівскы жупа, котра є здряджовательом музея, так уж од державы дістала шість міліонів з цілковой дотації 7,1 міліона. Послідня часть грошей має прийти до кінця януара слідуючого року. Як інформовала Даша Єленьова, говоркыня ПСК, з боку жупы ся вже зробили вшыткы протрібны крокы про приправу обновы.

Перерабляти ся буде два рокы

„В руках маєме ставебне поволіня і підписаный контракт з додавательом реалізачного проєкту, котрый буде выпрацованый до 31-го марца. Вєдно з докінчіньом реалізачного проєкту буде проходити приправа публічного обстараваня на додавателя ставебных робот,“ повіла про аґентуру Єленьова.

Жупа очекує выголошіня обстараваня до кінця мая того року. Зачаток ставебных робот буде залежати од резултату обстараваня, інформовала говоркыня з тым, же то очекують найпізніше на ярь слідуючого року.  Реконштрукція бы мала тырвати 24 місяців.

Велика реконштрукція

Музей модерного уменя Енді Варгола в Меджілабірцях є в просторах будовы із 80-років минулого столітя. В рамках реконштрукції ПСК планує оправити фасаду і просторы музея, прибудовати і надбудовати просторы. Будинок буде мати новы облакы, двері, стіны зо скла, підлогы, выминить ся електроіншталація, воздушна техніка і сістема забезпечіня.

Перебудова принесе і розшыріня ґалерії а депозіту, выникнуть новы ательєры, прибудуть інтерактівны елементы, буде і простор про освітні проґрамы, а тішыти ся мож і на інтереснішы експозіції.

Просторы розшырять ся о три штокы, чім выникне простор про розлічны конференції, мултімедіалны презентації, мали сценічны формы ці бісіды. На стрісі буде оддыхова зона у формі амфітеатру.

На велику реконштрукцію єдиного музея свого тіпу в Европі, і єдного з двох на світі, выділила грошы іщі влада Петра Пеллеґріні на своїм выїздовім засіданю в Кежмарку в октобрі 2019-го року в цілковій сумі 7,1 міліона евр. Першы два міліоны пришли в септембрі 2020-го року. Решта грошей в сумі 1,1 міліона має прийти до 31-го януара 2022-го року.

Автор фотоґрафії: Ян Штовка, MQEP

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА