Сумар дня на 26. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 26. лютого/фебруара 2021 р.

О Лемках в Православным Перегляді

Вышло третє чысло місячника «Православный Перегляд». Мож в ним найти м.ін. дискусию пн. «Наше місце», яка єст списом бесіды проведеной онляйн на тему традиций, вартости і інтеґрациі в церкви серед вірных, якы належат до ріжных нацийональных меншын. Дискусию вела і опрацувала Анна Радзюкєвич. Бесідувано і о Лемках, якы подля проф. Александра Наумова найменше піддают ся процесови уніфікациі і тенденциі до затераня локальности. До дискусиі прошеный был і Даміян Трохановскій, редактор нашого радия ЛЕМ.фм. Спомнул він напримір на потребу не выкликувати в наймолодшых почутя гіршости зо взгляду на приналежніст до меншыны. Оцінил актуальну ситуацию Лемків в контексті меджепоколіньовой трансмісиі. Цілу дискусию можете чытати в новым номері, на місцяц марец, «Православного Перегляду», як і на інтернетовым сайті місячника.

XXVIII Европа Карпат

27. і 28. лютого/фебруара буде проходила 28. конференция Европа Карпат. То форум стріч і дискусий о захованю богатства культуры і природы Середньой Европы, о реґіоні, Карпатах, Триморю, Европейскій Уніі, Вышеградскій Ґрупі, стратеґіях, економічным розвитку, ци перспективах спілпрацы. В тым році конференция одбуде ся в Красічыні і Перемышлю, але і онляйн. В подіі возмут участ представникы державных власти і самоурядів з держав будучых участниками спілпрацы карпатского реґіону. Тогорічна конференция буде тыкала м.ін. темы будовы скорой желізниці Варшава-Будапешт, доріг Via Carpatia i Via Baltica, та інчой інфраструктуры, яка лучыт Польщу з сусідами на полудни і пілночы. Участникы акциі постарают ся тіж одпвісти на звіданя, ци культурно-природнича дідовизна Карпат повинна быти вписана на листу світовой спадковины UNESCO і ци треба зміцнити стараня над культуровом дідовизном в рамках Карпатской Конвенциі.

Конференция памяти Юрия Новосільского

Музей Ікон в Варшаві просит обзерати конференцию посвячену памяти Юрия Новосільского «Іконостас – синтеза штукы в літургіі», зорґанізувану з нагоды 10. річниці смерти вызначного артисты, теолоґа і чловека літургіі. На конференцию складат ся шіст выкладів омавляючых феномен іконостасу в православній традициі і творчости Юрия Новосільского: «Іконостас як творчіст літургіі» Віталия Міхальчука, «Літургічна і теологічна ґенеза іконостасу» о. Генрика Папроцкого, «Іконостас в штуці І Республикы» єпископа проф. Михала Янохы, «Іконостас в творчости Юрия Новосільского та новы одкрытя сакральных творів артисты» др Кристины Черні, «Флореньскій-Новосільскій: Іконостас» др Ірины Татаровой та «Іконостас в музичній акциі літургіі» Лукаша Гайдучені. Вшыткых шіст прелекций мож обзерати на фейсбуковым профіли Музею Ікон в Варшаві.

XVII Ряшів Carpathia Festival

Рушат 17. едиция Медженародного Фестівалю Співанкы «Ряшів Carpathia Festival». Фінал подіі буде проходил на ряшівскым Рынку і в Підкарпатскій Фільгармоніі 20.-22. серпня/авґуста того рока, але лем до 28. лютого/фебруара приниманы сут зголошыня выконавців. До участи в Фестівалю можут ся зголосити особы од 16 рока жытя з цілого світа, якы запрезентуют дві авторскы співанкы в буд-якым языку. На основі присланых награнь, жырі выбере переможців першого етапу конкурсу, якы дале будут презентувати ся на фестівальовій сцені. В дотеперішніх едициях о участ в фіналі Фестівалю бороли ся репрезентанты 30 держав.