Сумар дня на 22. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 22. вересня/септембра 2026 р.

Новый рекорд Климківкы

Ситуация заливу в Климківці далі ся погіршат. Подля даных Реґіонального Заряду Водной Господаркы з 21. вересня/септембра, о 6.00 год., в резервуарі находило ся коло 4,19 млн м³ воды. То найнизшый рівен однотуваный в істориі Климківкы – попереднє мінімум, з децембра/грудня 2024 рока, выносило коло 4,22 млн м³ [кубометрів]. Зменшыня є особливо видиме в порівнаню з даныма з послiднiх тыжнів. Кінцьом липця/юлия резервуар містил коло 9,5 млн м³ воды, а 20. серпня/авґуста – коло 6,04 млн м³. За неполны два місяці кількіст воды зменшыла ся о понад половину. Єдном з причын дальшого зменшаня ся рівня єст утримуючый ся невеликій доплыв Ропы. Іщы 18. вересня/септембра до засобника вплывало коло 0,42 м³ воды на секунду, товды, коли одплыв выносил коло 1 м³/с. То означат, же Климківка далі тратит веце воды, як єст в силі згромадити. Тот смутный рекорд збільшат обавы на тему функцийонуваня екосистему резервуару і рікы.

Конференция «Низкій Бескід: спільный краєвид»

В четвер 24. вересня/септембра в Ґорлицкым Центрі Культуры одбуде ся конференция «Низкій Бескід: спільный краєвид. Даны, діалоґ, рішыня», підсумувуюча проєкт «Спільный Краєвид». Реґістрация участників зачне ся о 10.00 год. а офіцийне отворіня конференциі заплянувано на год. 10.15. Підчас подіі будут представлены результаты досліджынь, што тыкают реляций медже природничым і культуровым краєвидом Низкого Бескіду а досвідом його жытелів і хоснувателів. По презентациі рапорту, о 12.00 год., зачне ся дискусийный панель з участю експертів, што репрезентуют м.ін. ґеоґрафію, антрополоґію і социйолоґію. Конференция має быти простором бесіды о тым, як даны, досвід жытелів і експертскы знаня можут сперати рішыня, што тыкают спільного краєвиду реґіону.

Колиба PTTK на Маґурі

На Маґурі тырват будова новой колибы PTTK, котра найде ся на місци давного обєкту, запертого в 2021 році з причыны злого технічного стану. Згідні з теперішнім гармоноґрамом новый обєкт має приняти першых гости на початку 2028 рока. Істория колибы на тым місци сігат 50. років XX віку. Будову першого обєкту зачали в 1954 році з ініциятивы Станіслава Ґабриєля. До його возникніня схосновали м.ін. дерево, што походило з розбераных лемківскых хыж. Протягом дальшых декад колиба была єдным з важнiйшых туристичных пунктів Низкого Бескіду. По єй запертю експертизы переважыли о будові нового обєкту. В новым будинку найдут ся нічліговы місця, iдальня і технічны поміщыня, предвиджено тіж доступніст для осіб з неполносправностями та нову санітарну інфраструктуру. Роботы сут уж заавансуваны – выконали дальшы кондиґнациі і дахову конструкцию, а тепер роблене є покрытя даху. По парулітній перерві Маґура має зас быти цілорічном базом для туристів, што експлоруют Бескід.

Будова церкви в Ґладышові

В Ґладышові тырвают дальшы роботы при будові православной церкви Рождества св. Йоана Хрестителя. Теперішній етап буде обнимал м.ін. монтаж зробленых на замовліня выглядів а так само дубовых двери. Іх кошт выносит коло 65 тис. зл. На зовні святыні ведены сут роботы при оздобных аркадах. Рівночасні iдут роботы в дзвінници, де приготовлювана єст конструкция під підлогу выжньой кондиґнациі, на котрій в будучности мают завісити дзвоны. Як інформує парох парохіі о. Ярослав Ґрич, видно поступы будовы, єднак перед спільнотом наступны етапы і звязаны з нима выдаткы. Парохія веде збірку грошів на дальшы роботы. В послiднiх тыжнях колекты для будовы проходили м.ін. підчас православных торжеств в Білымстоку, Супрашли і на Святій Горі Ґрабарці. Нова святыня творена є в формі, яка навязує до традицийной лемківской церковной архітектуры.