На Словакії зачало асістоване списованя жытелів. Є важным про меншыны, акцентує Буковскый

На Словакії в понедільок 3-го мая 2021-го року зачало асістоване списованя жытелів. Тото списованя буде до 13-го юна. Є головно про діґітално вылученых жытелів, котры ся не годны были з будьякых причін самосписати од 15-го фебруара до кінця марца.

Асістоване списованя, значіть списованя за помочі асістента, котре є головно про сеніорів, людей без інтернету, ці марґіналізованы ромскы ґрупы, забезпечіть кажде місто і село. Плановане было, же буде проходити вєдно з електронічным самосписованьом, но з причіны пандемії го пересунули.

„Асістоване списованя буде тырвати шість тыжднів і буде проходити на цілій теріторії Словацькой републікы. Покля бы ся в дакотрых окресах ці краях згіршыла пандемічна сітуація, председа Штатістічного уряду Словацькой републікы може списованя перервати,“ повіла про аґентуру TASR говоркыня про Списованя жытелів, домів і квартелів 2021 Ясміна Штаудер.

Помагати будуть асістенты

При асістованім списованю поможе людям мобілный або стаціонарьный асістент. Самосправа на теріторії міст і сел зряджує контактне місце, або веце такых місць. Там має быти к діспозіції техніка і стаціонарьный асістент. Контактны місця не суть повязаны з тырвалым перебываньом жытеля, може їх навщівити будьхто і будьде.

Покля чоловік не може прийти до контактного місця, може собі ку собі домів закликати через телефонічный центер мобілного асістента. Жебы не приходило ку подводам, Штаудер припоминать, же нихто не ходить з асістентів проактівно дуркати на двері, але асістента собі треба покликати. Так само має асістент леґітімацію, котру вкаже при контакті з чоловіком, котрый собі поміч покликав.

Буковскый: Асістоване списованя є важным про меншыны

На Словакії ся в першім в історії електронічнім списованю самосписало 86 процент жытелів. Значіть, іщі все зіставать доста велике проценто тых, котры можуть овпливнити резулаты списованя.

І зато ку зачатку асістованого списованя дав выголошіня і уповномоченый влады Словацькой републікы про народностны меншыны Ласло Буковскый.

„З дотеперішніх резултатів видиме, же про актівістів приходить досправдова робота, але мойов повинностьов є звернути увагу старостів і пріматорів на то, жебы были максімално напомічны головно про сеніорів. В тій віковій катеґорії бывать заступліня членів народностных меншын векше як є словацьке середнє чісло, зато є про окремы народности, як і про успіх списованя і точны даны потрібне, жебы селами і містами становлены асістенты мали максімалну довіру містных жытелів і тоты їм признали свою народность,“ написав у выголошіню уповномоченый.

„Лем слободно признаны даны прозрадять о нашій країні найвеце детайлів і розкрыють їй богату културну розмаїтость,“ закінчує уповномоченый.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА