Найменше розвиты окресы дістануть о 12 міліонів веце

Міністерство інвестіцій, реґіоналного розвитку і інформатізації Словацькой републікы выїднало з Міністерством фінацній веце грошей на обновліня містных комунікацій, ходників, і на розвиток турістічного руху про найменше розвиты окресы.

Як інформовала аґентура TASR, первістну алокацію вызвы в сумі 4,9 міліона евр пізняли о далшых 12 міліонів, причім так підпорять 150 сел. Передтым мало ся підпорити лем 50 сел.

„Села і міста мають великы проблемы із своїма містныма комунікаціями, котры не дають ся фінанцовати із еврофондів. Сельскы драгы і ходникы суть часто в такім стані, же огрожують безпечность і здравя людей,“ підкреслила віцепремєрка і міністерка про реґіоналный розвиток Вероніка Ремішова.

Поміч піде до 150-ох сел в дванадцятьох окресах. На выходній Словакії то будуть села в окресах Кежмарок, Сабінів, Собранці, Свідник, Требішов і Воронів над Топльов. Вызва была про села з дванадцятьох найменше розвитых окресів, котрым у 2020-ім році скінчіла можливость черьпати фінанції.

Села подля резорту передложыли множество проєктів, з котрых найвекшу часть творили якраз актівности повязаны з будованьом і реконштрукіцйов комунікацій і ходників.

Міністерство інвестіцій, реґіоналного розвитку і інформатізації інформовало, же окрім проєктів з той вызвы почас рока підпорили ся і іншы проєкты про вісем найменше розвитых окресів за нецілых 6 міліонів евр, котры передкладали міста, села і здружіня.

„Проєкты были заміряны на ревіталізацію публічных просторів, зліпшіня гражданьской выбавлености і проєкты реґістрованых соціалных подників, цільом котрых є інтеґрація зневыгодненых кандідатів на роботу на робочім рынку, як і проєкты бізнісовых субєктів заміряных на іновацію выробных процесів,“ написав резорт.

Підпорены проєкты прямо вытворять новы робочі місця в окресах Бардейов, Ґелніця, Кошыці-околіця, Левоча, Меджілабірці, Михалівці, Стропків і Снина.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА