Музей в Монастырисках богатшый о колекцию лемківскых кроів

Музей в Монастырисках на Украіні збогатил ся о колекцию близко 150 примірів лемківского облечыня, інформувала о тым директорка Музейного Комплексу «Лемківскє Село» на украіньскым портали Укрінформ.

Цінну колекцию передал Вільям Джула, бывшый голивудскій проєктант кроів і колекцийонер давного лемківского облечыня. Сам Джуля за походжыньом є Лемком.

Як подала Віра Дудар, директорка Музейного Комплексу «Лемківскє село», до котрого трафила колекция, одтепер музей як єдиный на Украіні буде міг похвалити ся таком выставом, зато же в склад одданых облечынь не входят лем ориґінальны, часто маючы більше як 100 років, але тіж такы, котры запроєктувал на основі архівальных документів сам Вільям Джула.

За єй словами, збірку допоміг передати Владек Максимович, котрый має лемківскє коріня. То він сфінансувал транспорт облечыня, якє одтепер буде доступне в музейным комплексі в Монастырисках.

В колекциі находят ся жіночы і мужскы кроі, котры ждут на докладне описаня і документацию. Вступні уж в марци того рока збірку буде можна обзерати на выставі в Музейным Комплексі «Лемківскє село» в Монастырисках. В склад колекциі входят примірно кошелі, ногавкы, холошні, ляйбикы, кабаты, запаскы, ґорсеты, чепці ци капелюхы.

В Монастырисках і околичных місцевостях прожыват великє чысло потомных переселенців з Лемковины. Як раз ту был основаный Музейный Комплекс «Лемківскє село», што зберат материялы і експонаты, якы были привезены Русинами з Лемковины, кєд в «добровільно-примусовый» спосіб были они переселяны на радяньску Украіну. Під опіком музею сут тіж реконстууваны будівлі, якы мали бы навязувати до лемківскых, што ся находят на поли, де одбыват ся фестіваль Дзвоны Лемківщыны.