Сумар дня на 9. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 9. лютого/фебруара 2022 р.

З Кракова над само Адриятицкє Море

Чешскій желізницьовый перевозник RegioJet отримал згоду польского Уряду Желізницьового Транспорту, жебы урухомити нове желізницьове получыня з Кракова до Рієкы і Спліту. Перевозник свій внесок зложыл уж в 2021 році. Выдана згода обовязує од 15. червця/юнія того рока до 26. вересня/септембра 2026 рока. Застерігат она єднак, же перевозник не буде міг продавати білетів в державній реляциі, што єст забезпечыньом перед творіньом конкуренциі локальным перевозникам. Потяг буде курсувал з Польщы до Хорвациі 4 місяці каждого рока, од червця/юнія до вересня/септембра. Переізд зачынал ся буде в Кракові, але по дорозі потяг затримат ся іщы в штырьох польскых містах, м.ін. в Катовицях. Уж в самій Хорвациі в місцевости Оґулин ваґоны будут ділены на дві части, єдна поіхат до Спліту і друга до Рієкы. Вступні потяг мал зачати курсувати уж того літа, єднак як підкрислят перевозник – нич іщы не єст певне. Пляны мішат пандемія і часты зміны ограничынь, што тыкают подорожуваня.

Ґміна Ґолриці уж четвертый раз отримала дофінансуваня на комасацию ґрунтів

Вчера, 8. лютого/фебруара, підписаны і переданы были догваріня в рамках Проґраму Розвитку Сельскых Обшыри 2014-2020 «Комасация ґрунтів села Сяры в Ґміні Санкова Ґорлицкій Повіт». В подіі взяли участ представникы власти ґміны Санкова, Ґорлицкого Повіту і Малопольского Воєвідства, м.ін. віцемаршалок Лукаш Смулка, котрый підкрислил, як важне для нашого реґіону єст рільництво, а комасация ґрунтів дає особливы можливости його розвитку. Ґорлицкій повіт при четвертым уж наборі о признаня фінансовой помочы зложыл внесок о дофінансуваня в высокости понад 8 млн зл на операцию комасациі ґрунтів в ґміні Санкова. Комісия оцінила внесок позитивні і признала цілу квоту, о яку старал ся повіт. Не єст то перше дофінансуваня отримане ґорлицкым повітом з того проґраму, разом повіт отримал уж 43 млн зл.

В Західніх Татрах обовязує 4. ступін лявінового загорожыня

Вчера ратівникы з Гірскых Ратівничых Служб зо Словациі оголосили 4. ступін лявінового загорожыня для обшыри Західніх Татр і Малой Фатры. В остатніх трьох днях впало од 20. до 50. цм снігу, а в горах цілый час курит. Найбільше сніжной покрывы явило ся як раз в Західніх Татрах і Малій Фатрі. Додатково в горах дує міцный вітер, што разом спричынят творіня тзв. сніжных дощок і подушок, котры аж і при невеликым додатковым обтяжыню можут ся одорвати. З той причыны закрыли до одкликаня Колибу Жарскє в Жарскій Долині. Подібна ситуация єст і по польскій страні Татр, де зо взгляду на безпеку закрыли шляк над Морскє Око. Четверта ступін лявінового загорожыня єст найвысшом, яку мож оголосити в обшыри Татр, зато ратівникы просят тримати безпеку при прогульках в горы і не выходити в высшы іх партиі.

Жытелі Польковиц мают нагоду поіхати на пєсу до ліґницкого театру

Центр Культуры в Польковицях орґанізує выізд до Театру імени Гелены Моджеєвской в Ліґници на пєсу пн. «Голосы новой Білоруси». Выізд пройде в суботу, 26. лютого/фебруара, зорґанізуваным центром транспортом. Ціна то 40 зл за особу, записы і дрібниці находят ся на сайті польковицкого Центра Культуры. Пєса «Голосы новой Білоруси» авторства Андрєя Курєйчыка, єдного з найбарже нахороджуваных білорускых драматурґів, оповідат істориі жертв репресий режіму Лукашенкы. З більше як сімстох автентичных реляций автор выбрал парудесят, в котрых нич не змінял, аж і імен ци назвиск репресийонуваных. Драма одраз зыскала популярніст, а в тыжден од премєры перетлумачено ю на десят языків.